Hytaýyň Guançžouda ýerleşýän Kaiwa Technology kompaniýasy adam düwünçegini göwrelilikden başlap, dogulýança götermäge ukyply emeli ýatgyly robotyň döredilendigini habar berdi. Önümiň bahasy 14000 dollardan gymmat däl bolup, 2026-njy ýylda bazara çykar diýlip garaşylýar.
Interesting Engineering neşiriniň habaryna görä, kompaniýa eýýäm başlangyjyň jemgyýetçilikde ara alnyp maslahatlaşylmagy barada hökümete haýyş bilen ýüz tutdy.
Ulgam amniotik suwuklyk bilen doldurylan emeli ýatga esaslanýar. Düwünçejik emeli göbegiň üsti bilen iýmitlener we emeli aň düwünçegiň ösüşine gözegçilik eder. Tehnologiýa häzirki wagtda haýwan düwünçeklerinde - syçanlarda we guzularda synagdan geçirilýär.
Şeýle-de bolsa, kanuny çäklendirmeler bar. Hytaýda we beýleki birnäçe ýurtlarda adam düwünçekleriniň zenan bedeninden daşarda ösdürilmegine diňe iki hepdä çenli rugsat berilýär. Bu robotyň çagany göwresinde göterip, dogurmagyna mümkinçilik bermeýär. Eger kompaniýa bu kanuny päsgelçiligi ýeňip geçmegi başarsa, hünärmenler adamda synaglary 2030-njy ýyldan soň geçirmäge başlap boljakdygyny çaklaýarlar. Şol wagta çenli barlaglar laboratoriýanyň derejesinde galar.
Şol bir wagtyň özünde Hytaýda ýene bir işläp taýýarlama - ýyladyşhanalarda ösümlikleri tozanlatmak üçin döredilen GEAIR seçgiçi robot hödürlendi. Genetiki taýdan önelgesiz erkek güller tozanlatmak töwekgelçiligini aradan aýyrýar we alymlaryň çaklamalaryna görä, prosesiň awtomatlaşdyrylmagy ekiniň hasylyny ep-esli ýokarlandyrar.
