Pekinden 300 km uzaklykda, Içki Mongoliýanyň günortasynda ýerleşýän Ordos şäherinde diňe wodorod bilen işleýän 30 megawatt kuwwatly turbinanyň gurluşygyna başlandy. Ol dünýädäki iň uly ýapyk görnüşli wodorod energiýa ulgamynyň düzümine girer.
Öz analoglaryndan tapawutlylykda täze turbina tebigy gaz goşulmazdan diňe wodorod ulanar. “Fuel Cell Works” neşiriniň habaryna görä, Taslama ýel we gün öndürmekligi, wodorod saklaýyş ulgamlaryny, elektrolizerleri we ammiak önümçiligini bir toplumda birleşdirer.
Ulgam umumy kuwwaty 500 megawatt bolan ýel turbinalaryny, bäş megawat kuwwatly Gün elektrik stansiýasyny we sagatda 4,3 tonna wodorod öndürjek 240 megawat kuwwatlylygy bolan elektrolizerleri öz içine alýar. Saklamak üçin hersiniň göwrümi 1,875 kub metr bolan 12 sany sferik rezerwuar göz öňünde tutulan. Bu ýerde ýylda 150 müň tonna çenli “ýaşyl” ammiak öndürmek meýilleşdirilýär.
Taslama ýapyk görnüşli "elektrik-wodorod-elektrik" shemasyny durmuşa ornaşdyrmagy maksat edinýär. Ol energiýanyň wodoroda öwrülmegine, ony saklamaga we gaýtadan dikeldilýän energiýa önümçiliginiň pese gaçýan döwürlerinde elektrik öndürmek üçin ulanylmagyna mümkinçilik berer. Bu elektrik üpjünçiliginiň durnuklylygyny ýokarlandyrar we torda bökdençlikleriň ýüze çykmak töwekgelçiligini azaldar.
