Hytaýdan totuguş Sýaoguý reňkleri çalt tapawutlandyrmak başarnygy bilen Ginnesiň rekordlar kitabyna girdi. Ol 10 reňkden ybarat ýumuşdan 33,5 sekuntda baş çykaryp, guşlaryň arasynda iň gowy netijäni görkezdi.
Synag wagtynda Sýaoguýa 10 sany kiçiräk gap we şol bir reňklerdäki 10 top berildi. Ähli predmetler garyşdyryldy we totuguş toplary degişli gaplara salmalydy. Ýumuş 10 meňzeşligiň ählisini mümkin boldugyndan çalt ýerine ýetirmegi talap edýärdi.
Sýaoguý hatda iki ýakyn gülgüne reňki-de tanamagy başardy. Ilkibaşda ol goýy gülgünäni ýiti gülgüne üçin niýetlenen gaba goýup, toplary bulaşdyrdy, ýöne ýalňyşandygyny bilip, ony düzetdi.
Guşuň eýesi Sin Fen Sýaoguýa 2020-nji ýylda heniz guş çagasy wagty duşandygyny aýtdy. Onuň sözlerine görä, totuguş ilkibaşdan oýunjaklar, aýratynam, dürli reňkli toplar bilen gyzyklanýardy. Şonda Sin Fen oňa predmetleri reňkler boýunça tertipleşdirmegi öwredip başlady.
Sýaoguý beýleki garyndaşy – ABŞ-dan Apollon atly totuguş bilen umumy dil tapyp bilerdi. Onuň eýeleri Salton we Wiktoriýa Meýsonlar guşa predmetleri tapawutlandyrmagy öwretdi. Ol üç minutda “tomzak”, “kitap” we “jorap” ýaly 12 obýekti dogry kesgitlemegi başardy.
