Lokarnoda (Şweýsariýa) geçirilen 78-nji kinofestiwalyň baş baýragyny – “Altyn barsy” režissýor Sýo Miýakeniň “Iki möwsüm, iki nätanyş” (Два сезона, два незнакомца) ýapon filmi aldy. Bu barada abraýly kinofestiwalyň guramaçylary habar berdi.
Film esasy bäsleşige gatnaşan 17 filmiň arasynda ýeňiji hökmünde saýlandy. Lokarnonyň baş baýragy soňky 18 ýylda ilkinji gezek ýapon filmine berilýär diýip, NHK neşiri belleýär.
Filme günorta koreýaly aktrisa Sim Yn Gýon we ýaponiýaly aktýorlar Susumi Siniti we Kawaý Ýumi gatnaşdy. Sýužetiň merkezinde nätanyş adamlar bilen duşuşyklaryň netijesinde öz durmuşyna gaýtadan göz aýlaýan zenan ssenariçi durýar.
Festiwalyň saýlanan filmleriniň ýene biri “Ak ulitka” (Белая улитка) boldy. Ol eminleriň Ýörite baýragyna we aktýorlyk üçin baýraklara mynasyp boldy. Iň gowy režissýor hökmünde “Ýaralanan toprak barada kyssalar” (Рассказы о раненой земле) filmi üçin Liwandan Abbas Fahdel ykrar edildi.
Esasy bäsleşigiň emin agzalarynyň başlygy kambojaly režissýor we Kann kinofestiwalynyň laureaty Riti Pan boldy.
Lokarnodaky kinofestiwal awtorlyk kinolarynyň Ýewropa festiwallarynyň iň gadymylarynyň biridir. Ol 1946-njy ýyldan bäri her ýyl awgust aýynda Şweýsariýanyň Lokarno şäherinde geçirilýär. Festiwalyň baş baýragy – “Altyn bars” esasy bäsleşigiň iň gowy filmi üçin berilýär.
