Britan patyşa maşgalasynyň Şotlandiýadaky rezidensiýasynda, Balmoral galasynyň web sahypasyndaky onlaýn dükanda önümleriň täze görnüşleri peýda boldy. Indi markaly çaý önümleri, deri önümleri, oýnawaçlar we çagalar üçin kitaplar bilen birlikde itler üçin hem dürli önümleri satyn alyp bolýar.
Dükanda indi “Balmoral galasynyň aşhanalarynda elin taýýarlanan we elin bişirilen” we “dört aýakly şazadalaryňyz we şa gyzlaryňyz üçin söýgi bilen gaplanan” arassa tebigy kitirdewük kökeler satylýar. Kökäniň düzümi gury towuk çorbasyndan, bugdaý unundan we ýumurtgadan ybarat. 75 gramlyk gaplamanyň bahasy 5 funt sterling. Tagamlaryň gapdaly bilen gezelenje gidilende olary salar ýaly 30 funt sterlinge torba hem alyp bolýar.
Şeýle hem, täze harytlaryň içinde 32 funt sterlinglik boýunýüp, 40 funt sterlinglik twid ýüp we şa tugrasynyň şekili basylan 28 funt sterlinglik ýalak bar.
Patyşa Karl III bilen şa zenan Kamillanyň itleri gowy görýändikleri mälimdir. Umuman, itler hemişe britan şa maşgalasynyň aglaba nesilleriniň esasy öý haýwanlary bolupdyr.
Balmoral galasynyň dükanynyň web sahypasynda itlere niýetlenen harytlary satmakdan alnan ähli girdejiniň haýyr-sahawata gönükdiriljekdigi aýdylýar.
Şonuň bilen bir wagtda HM King Karl III teddi aýylarynyň çäkli toplumy satuwa çykaryldy. Olaryň bahasy 224,17 funt sterling diýip, britan monarhynyň Highgrove House and Gardens atly başga bir dükanyna salgylanýan Sky News habar berýär .
Oýnawaç meşhur Paddington aýyjygynyň döredijileri tarapyndan ýasaldy. Ýadygärlik oýunjak kümüş reňkli moherden we pagta mahmaldan ýasalan. Ol şa wenzeli, orden talasy we Çarlz III-iň öz täç geýiş dabarasynda geýen Daňy ordeni ýyldyzynyň takyk nusgasy bilen bezelipdir. Diňe 1948 nusgasy çykaryldy. Döredijiler aýynyň "çagalar üçin däl-de, diňe uly ýaşly kollektorlar üçin" niýetlenendigini aýdýarlar.
