Meşhur McLaren ýaryş topary üýtgeşik auksion barada yglan etdi: auksiona dürli ýaryşlar – “Formula-1”, Indycar we ulaglaryň çydamlylygy boýunça dünýä çempionaty (WEC) üçin niýetlenen üç ulag çykarylar. Ýöne bir nýuans bar: bu ulaglaryň hiç biri entek taýýar görnüşde ýok.
Auksion 5-nji dekabrda, “Formula-1” möwsüminiň Abu-Dabidäki finalyndan iki gün öň geçiriler. Satuwa 2026-njy ýylyň “Formula-1” awtomobili (onda indiki möwsümde Monakonyň Gran-prisinde Oskar Piastri ýa-da Lando Norris çykyş eder), 2026-njy ýylyň maýynda “Indianapolis-500” ýaryşynda Patrisio O’Uord üçin McLaren Indycar ulagy we 2027-nji ýylda “Le-Manyň 24 sagadynda” görkeziljek WEC awtomobili çykarylar.
Alyjylar taýýar ulagy derrew alyp bilmez. “Formula-1” awtomobili diňe 2028-nji ýylda eýesine gowşurylar. Onuň wagtlaýyn ýerini tutujy hökmünde 2025-nji ýylyň şoukary hödürlener, galan ulaglar çykyşlar tamamlanandan soň berler.
McLaren-iň ýolbaşçysy Zak Braun auksiony awtosport taryhyna goşulmaga mümkinçilik diýip atlandyrdy. Topar Üç täje – bellenilen üç ýaryşda ýeňiş gazanmaga ymtylýar. Ýaryşa gatnaşyjylardan şeýle kolleksiýany diňe Grem Hill (oňa on möwsüm gerek boldy – 1963-nji ýyldan 1972-nji ýyla çenli), toparlardan McLaren (1972-nji ýyldan 1995-nji ýyla çenli wagt sarp edildi) ýygnamagy başardy.
Awtomobilleriň bahalaryny çaklamak kyn, ýöne gürrüň millionlarça dollar barada gidýär. Deňeşdirmek üçin, RM Sotheby’s häzir 1997-nji ýylyň McLaren F1 ulagyny 23 mln dollara hödürleýär. Ýaryş ulaglary, adatça, arzan bolýar: Lýuis Hemiltonyň “Mersedesiň” düzüminde utan ilkinji ýaryşynda ulanan 2013-nji ýylyň Mercedes F1 W04 ulagy 18,8 mln dollara, Mihael Şumaheriň Ferrari F2001 ulagy bolsa 18,17 mln dollara satyldy. Ýaryşlara gatnaşan ulaglaryň arasynda rekordy 50-nji ýyllaryň Mercedes W196-sy saklaýar – 52,52 mln dollar. Ýene bir rekordy 1955-nji ýylyň Mercedes-Benz 300 SLR Uhlenhaut Coupe ulagy goýdy, ol 2022-nji ýylda 142 mln dollara satyldy, ýöne ulag ýaryşlara gatnaşmady.
