McLaren britan brendi Formula-1-de "Konstruktorlar Kubogynda" gazanan onunjy ýeňşiniň hormatyna çäkli mukdardaky Artura Spider Championship Edition superkaryny hödürledi. Bu awtoulaglardan dünýä boýunça diňe 10 sany öndüriler.
Her bir awtoulag McLaren Special Operations (MSO) bölümi tarapyndan ýörite taýýarlanyp, elde reňklenipdir. Onuň reňkleri — Mayan Orange we Onyx Black — 2025-nji ýylyň möwsüminde ýeňiş getiren McLaren MCL39 bolidiniň dizaýnyny gaýtalaýar. Dizaýnyň içine toparyň taryhyndaky öňki çempion ulaglaryň şekilleri we "10" sany ýyldyzly nyşanlar ýaly gizlin maglumatlar ýerleşdirilipdir.
Awtoulagyň daşky görnüşini Super-Lightweight Dynamo atly ýalpyldawuk gara diskler, ýörite sport görnüşli gaz çykaryjy ulgam bezeýär.
Salonyň içinde oturgyçlarda keşdelenen "10" sanysy, rulda sarymtyk reňkli bellik, Nappa derisi we Alcantara matasy bar.
Her bir awtoulagda şol çempionlyk möwsüminiň statistikasyny görkezýän ýörite tabliçka bar.
Awtoulagyň bosagasynda Formula-1-iň 2025-nji ýyldaky çempiony Lando Norris we onuň topardaşy Oskar Piastri tarapyndan goýlan hakyky gollar bar.
Superkaryň kapotynyň aşagynda 3.0 litrlik V6 hereketlendirijisinden we elektrik motorundan ybarat bolan 700 at güýjüne (käbir maglumatlara görä 690 bhp) eýe bolan gibrid ulgam ýerleşýär.
0-dan 100 km/sag tizlige bary-ýogy 3 sekuntda ýetýär.
Häzirlikçe bu eksklýuziw awtoulagyň bahasy we haçan satylyp başlanjakdygy mälim edilmedi. Emma eýelerine awtoulag bilen birlikde sürüjileriň goly goýlan ýadygärlik sowgatlarynyň hem beriljekdigi habar berilýär.
