RM Sotheby's auksion öýi Abu-Dabidäki söwdalaryny McLaren F1 superkaryny $25,317,500 dollara satmak bilen tamamlady. CarBuzz neşiriniň maglumatlaryna görä, bu pul möçberi bu model üçin täze bahanyň rekordy bolup, öňki resmi maksimumdan 5 million dollara ýokarydyr.
Satylan bu nusga 1994-nji ýylda öndürilip, umumy ýollar üçin çykarylan 64 sany McLaren F1-iň 14-njisidir. Ilkibaşda sary reňkli kuzowdaky awtoulag Bruneýiň patyşa maşgalasyna degişlidi. Soňra ol birnäçe gezek eýesini çalşyrdy, olaryň arasynda McLaren-iň direktorlarynyň biri hem bardy. 1997-nji ýylda Mihail Şumaher onuň bosagasynda awtograf galdyrdy.
2007-nji ýylda superkar Uokingdäki McLaren zawodynyň üsti bilen toplumlaýyn gaýtadan gurulmagy başdan geçirdi. Işleriň dowamynda awtoulag Irbis White atly ak reňke boýaldy, oňa hemişelik goýlan ganat we täze öňki bamperli High Downforce Kit aerodinamiki toplumy ornaşdyryldy. Maşynyň optikasy, wyhlopy çalşyryldy, sürüjiniň oturgyjy bolsa karbon karkasly boldy.
Gaýtadan gurmak işleriniň bahasy $500 müň dollara golaý boldy. Şol wagtlar awtoulagda Formula-1-iň piloty Lýuis Hemiltonyň hem goly peýda boldy.
Satylan kupeniň geçilen ýoly 22 müň kilometrden sähelçe köpdür.
