Amerikanyň Ryn Motors kompaniýasy “Formula 1” awtoulaglarynyň stilinde dizaýn edilen FP3 sport ulagyny işläp düzýär. Awtoulagy jemgyýetçilik ýollarynda ulanmaga rugsat bermek meýilleşdirilýär.
Esasy wersiýanyň bellenmeli aýratynlygy onuň üç tigirlidigidir: yzky okda ýeke tigir. Bu usul ulagyň has ýeňil talaplar astynda üç tigirli welosiped hökmünde sertifikatlaşdyrylmagyna mümkinçilik berer. Şol bir wagtda, satyn alnandan soň iki tigirli doly bahaly yzky ok goşmaça töleg töläp gurnalyp bilner.
Kompozit materiallardan ýasalan kuzow awtoulagyň agramyny ýarym tonnadan biraz gowrak edýär. Işläp düzüjileriň maglumatlaryna görä, aerodinamik elementler takmynan 320 kilogram basyş güýjüni döredýär.
Hereketlendiriji 210 at güýjüne eýe bolan 1340 kub santimetrlik Suzuki Hayabusa hereketlendirijisidir. Has gymmat görnüşi 290 at güýjüne çenli güýçlendirilýär. Iki görnüşi hem alty tizlikli mehaniki geçiriji bilen üpjün edilen we üç sekuntdan az wagtyň içinde 100 km/sag tizlige ýetip bilýär.
Sport awtoulagynyň başlangyç bahasy 78 500 dollar. Eltip berişlere şu ýylyň noýabr aýynda başlanmak meýilleşdirilýär.
