CATL kompaniýasy özüniň rekord derejede uzak hyzmat etjek täze Naxtra natriý batareýasynyň aýratynlyklaryny tassyklady. Öndürijiniň maglumatlaryna görä, nazaryýetde ol 10 000 zarýad sikline çydamly bolup, sygymyň azyndan 85%-ini saklaýar. Bu ulagyň, takmynan, 5,8 mln km ýol geçmegine deň bolup, ol 600-800 müň km üçin niýetlenen häzirki LFP batareýalaryndan ýedi esse köpdür diýip, Undecided neşiri ýazýar.
Ortaça sürüji ýylda 10-30 müň km geçýär, şonuň üçin Naxtra batareýalary adaty akkumulýatorlardan has köp wagt hyzmat eder.
Täze tehnologiýanyň ýene bir artykmaçlygy onuň arzanlygydyr: çen-takmyn baha kWt/sag üçin 10 ýewro barabar. Şeýlelikde, 70 kWt/sag batareýanyň bahasy, takmynan, 700 ýewro bolar. Şular ýaly litiý batareýasy 7000 ýewro düşýär.
Mundan başga-da, Naxtra -40-dan +70°C-a çenli temperatura çydamly bolup, gyşyň has ýowuz şertlerinde-de sygymyň 90%-ini saklaýar.
Batareýanyň yzygiderli önümçiligine şu ýyl başlamak meýilleşdirilýär. Geely, Chery, GAC, Voyah we beýleki brendlerden 30-dan gowrak model Freevoy ady bilen bu akkumulýatorlara eýe bolar. Tehnologiýa hem ýeňil awtomobillerde, hem täjirçilik ulaglarynda ulanylar.
Eger Naxtra-nyň görkezijileri iş ýüzünde tassyklansa, elektromobiller batareýany çalyşmazdan has uzak wagt ulanylyp bilner. CATL munuň pudakdaky düzgünleri doly üýtgedip biljekdigini aýdýar. Kompaniýa öwrülişigi wada berýär.
