Türkmen türgenleri 14 ýaşa çenli tennisçileriň halkara ýaryşynda üç altyn we bir bürünç medaly gazandylar. Ýaryşlar Tailandyň Nontaburi welaýatynda (Beýik Bankok) Aziýanyň Tennis Federasiýasynyň (ATF) guramagynda geçirildi.
Ýaryşa 12 ýurt Awstraliýa, Wýetnam, Gongkong, Hindistan, Indoneziýa, Hytaý, Günorta Koreýa, Saud Arabystany, Singapur, Tailand, Türkmenistan we Şri-Lanka gatnaşdy.
Türkmen toparynda iki altyn medaly 13 ýaşly Aly Geldiýew getirdi. Ol ýekelikde duşuşykda Gongkongdan Şiwa Mohany 6:3, 6:1 hasaby bilen ýeňdi we toparlaýyn ýaryşynda Kerimgeldi Guldurdyýew bilen bilelikde tailandly Denis Khiawraksa / S. Laoamornpaniç jübüdini 7:5, 6:4 hasaby bilen ýeňdi.
Ýene bir altyn 13 ýaşly Aýlara Kakabaýewa gazandy. Ol tailandly P.Daungkhlawy 1:6, 6:1, 3:0 Retd (garşydaşy oýny dowam etdirmekden ýüz öwürdi) hasaby bilen ýeňdi.
Bürünç medaly 9-njy synp okuwçysy Anna Ponýatowa gazandy, ol Gongkongdan Lam Çeukuny 4:1, 3:5, 4:1 hasaby bilen ýeňdi.
