Microsoft “Patch Tuesday-iň” çäklerinde täzelenmeler bukjasyny çykaryp, Windows-da, Office-de, Edge brauzerinde we beýleki hyzmatlarda 107 gowşaklygy düzetdi. Kompaniýanyň maglumatlaryna görä, olaryň arasynda howplulary hem bar, ýöne hakerler tarapyndan hakyky hüjümlerde ulanylan ýagdaýlar hasaba alynmady diýip, PSWorld ýazýar.
Windows 10, Windows 11 we Windows Server operasion ulgamlarynda 67 näsazlyk düzedildi. CVE-2025-53766 (GDI API) we Windows Graphics Component-de CVE-2025-50165 howply diýlip atlandyryldy. Olar ýörite taýýarlanan saýta girilen ýagdaýynda hakeriň kompýuterde zyýanly kody işletmegine mümkinçilik berýär.
Hyper-V wirtuallaşdyryş ulgamynda üç esasy mesele düzedildi: CVE-2025-48807 – wirtual maşyndan hostda kody işe girizmek, CVE-2025-53781 – gizlin maglumatlaryň syzmagy, CVE-2025-49707 – wirtual maşyn identifikatoryny çalyşmak.
Marşrutlaşdyrma we uzak aralykdan elýeterlilik hyzmatynda (RRAS) 12 gowşaklyk düzedildi: altysy – uzak aralykdan kody işletmek mümkinçiligi, altysy – maglumatlaryň syzmagy bilen baglanyşykly.
Office bukjasynda 18 näsazlyk düzedildi, olardan 16-sy – RCE gowşaklygy. Dördüsi, şol sanda Word-da ikisi howply diýlip ykrar edildi. Olary hatda faýly açmazdan deslapky görüş penjiresi arkaly ulanyp bolýar.
Edge brauzeri 139.0.3405.86 (Chromium 139.0.7258.67) wersiýasyna çenli täzelendi, Android üçin wersiýada iki näsazlyk ýapyldy. Indiki täzelenme 2025-nji ýylyň 9-njy sentýabryna meýilleşdirilýär.
Microsoft Windows 7 we 8.1-i ulanyjylara goldaw we soňky düzedişleri almak üçin Windows 11 24H2-ä geçmegi maslahat berýär.
