Perplexity startapy Google kompaniýasyna Chrome brauzerini satyn almak üçin 34,5 mlrd dollar teklip etdi. Bu barada The Wall Street Journal we Bloomberg habar berdi. Bu baha 18 mlrd dollar bilen bahalandyrylýan Perplexity-niň öz bazar bahasyndan tas iki esse ýokarydyr.
Teklip sişenbe güni, eger ABŞ-nyň hökümeti Google-y brauzeri satmaga mejbur etse, kompaniýanyň ony satyn almaga taýýardygyny aýdanyndan birnäçe aý soň iberildi. Ozal Perplexity TikTok-yň amerikan aktiwlerini-de satyn almaga gyzyklanma bildiripdi.
Google iň bolmanda kazyýetiň karary çykýança brauzeri satmak meýilnamasyny yglan etmedi. Perplexity-niň wekili Jessi Duaýer The Verge neşirine maglumatyň dogrudygyny tassyklady.
Perplexity-niň işewürligi ösdürmek boýunça müdiri Dmitriý Şewelenko Bloomberg bilen söhbetdeşlikde birnäçe iri maýa goýum gaznasynyň şertnamany doly maliýeleşdirmäge razydygyny aýtdy. Ol Google razylyk beren ýagdaýynda startapyň Chrome bilen Chromium-yň ösüşine iki ýylyň içinde 3 mlrd dollardan gowrak maýa goýjakdygyny belledi.
Ozal Chrome-y satyn almaga ChatGPT-ni işläp düzüji OpenAI kompaniýasy hem gyzyklanma bildirdi.
ABŞ-nyň Adalat ministrligi Google monopolist diýlip ykrar edilenden soň, Chrome-y satmaga mejbur etmekçi bolýar. Kompaniýa onuň gözleg ulgamyny brauzerlerde hem-de Apple we Samsung smartfonlarynda esasy ulgama öwren köp milliardlyk şertnamalar sebäpli kanuny bozmakda aýyplanýar. Iş boýunça çözgüde awgustyň ahyrynda garaşylýar. Google-yň özi bölünişige doly garşy çykýar.
