Kanadanyň Wankuwer şäherinde oftalmolog Greg Moloni adaty bolmadyk operasiýany etdi. Ol 75 ýaşly Geýl Leýniň göz hanasyna dişi implant etdi we onuň görüşini dikeltdi. Lukmançylykda seýrek duşýän bu prosedura osteo-odontokeratoprotezlemek diýilýär diýip, ýerli CBC radiostansiýasynyň web sahypasy habar berýär.
Leýn on ýyl mundan ozal göz perdesinde yz galdyrýan autoimmun keselinden kör bolupdy. "Bu meni gynandyrdy. Birden görmekden mahrum bolmak we gaýdyp görmek nesip edermikä diýen sorag barada pikir edýärdim" – diýip, ol gürrüň berdi.
Bu zenan şeýle operasiýa edilen üçünji kanadaly boldy. Lukman hassanyň dişinden material alyp, ony birnäçe aýlap ýaňagyna wagtlaýyn oturdyp, soň bolsa aýyrdy. Bu aralykda diş hassanyň gözünde plastik teleskopy saklamak üçin zerur bolan güýçli birleşdiriji dokumalar bilen örtüldi. Bu amalyň artykmaçlygy dişiň we töweregindäki dokumalaryň beden tarapyndan ret edilmezligidir.
"Bu çylşyrymly we geň operasiýa, ýöne esasan göz perdesiniň çalşylmagyny öz içine alýar" – diýip, hirurg belledi.
Operasiýadan soň Leýn dikelişiň ýakymsyz, ýöne agyrysyz döwri başdan geçirdi. Ilki bilen ýagtylygy, soň bolsa şekilleri görüp başlady. Alty aýdan soň töweregindäki adamlaryň ýüzlerini saýgaryp bildi.
"Men köp reňkleri görüp bilýärin, töweregimde bolup geçýän zatlary saýgarýaryn: agaçlar, otlar, güller - bu zatlary ýene görmek nähili ýakymly" – diýip, Leýn begenjini paýlaşýar. Ol gapdaldan kömeksiz ýakyn aralyga gezelenç edip, has çalasyn we garaşsyz bolmak isleýär. Pensioner zenan ýakyn wagtda görüşini hasam gowulandyrmaly täze äýnegi alar.
