Iýul aýynyň başynda Tehasa inen weýrançylykly suw joşguny Trewis okrugynda taryhdan öňki yzlaryň ýüze çykmagyna getirdi. Bu açyş barada CNN habar berýär.
Tebigy betbagtçylykdan soň ýerli ýaşaýjylara harabalygy arassalamaga kömek edýän meýletinçi Sendi-Krik sebitinde üç dyrnakly 15 sany uly yzy tapdy. Soňra hünärmenler bu yzlary 100 mln ýyldan gowrak ozal dinozawrlaryň galdyrandygyny anyklady.
“Dinozawrlara degişli yzlar uzynlygy 11 metr töweregi bolan iki aýakly ýyrtyjy akrokantozawra meňzeş haýwan tarapyndan galdyrylypdyr” – diýip, Ostindäki Tehas uniwersitetiniň Jekson mekdebiniň Ýer taryhy muzeýinden paleontolog Metýu Braun belledi.
Onuň aýtmagyna görä, yzlaryň ýaşy, takmynan, 110-115 mln ýyla, her biriniň uzynlygy bolsa 45-51 santimetre barabar.
Yzlaryň ýaşyny olaryň 110 mln ýyllyk Glen-Rozyň hek gatlaklarynda saklanyp galmagy netijesinde anyklamak başartdy.
Trewis okrugy, takmynan, 113 mln ýyl ozal ýaşan zawropodlaryň we teropodlaryň köp sanly yzlarynyň saklanyp galan “Dinozawrlaryň jülgesi” döwlet seýilgähinden 320 km günortada ýerleşýär. Bu syýahatçylar we paleontologiýany söýüjiler üçin meşhur ýerdir.
Paleontolog Braun topar bilen bilelikde tiz wagtdan tapyndylary has düýpli öwrenmek üçin Trewis okrugyna gaýdyp gelmegi meýilleşdirýändigini aýtdy. Ol bu yzlaryň haýsy görnüşlere degişlidigi we olaryň dinozawrlar topary ýa-da diňe bir haýwan tarapyndan galdyrylandygy barada goşmaça maglumat almak isleýär.
