Mansory týuning-atelýesi Porsche 911 Turbo S Cabriolet-iň aýratyn týuning wersiýasyny hödürledi. Bu model P9LM EVO 900 adyny aldy we bary-ýogy ýedi nusgada çykarylar.
Awtomobil täze kuzow elementleriniň netijesinde özüne çekiji daşky keşbe eýe boldy. Detallaryň köpüsi, şol sanda kapot, öňdäki bamper, tigir arkalaryny ulaldyjylar, gapdal goşundylar we yzdaky uly anti-ganat mermer nagyşly karbondan taýýarlandy. Yzda täze diffuzor we üç sany gaz çykarýan turba oturdyldy.
FV.5C tigirleriniň ululygy dürli (öňdäkiler 21 dýuým, yzkylar 22 dýuým) bolup, karbon ulanmak bilen taýýarlandy. Awtomobiliň salony ak bezeg elementleri bilen gara reňkde ýerine ýetirildi.
Güýç enjamy hem üýtgeşmä sezewar boldy. Turbinaly 3,8 litrlik alty silindrli oppozit hereketlendiriji indi, takmynan, 887 at güýjüni berýär. Aýlanma güýji hem artdyryldy we indi 1050 Nm barabar. Bu hereketlendirijiniň adaty wersiýasy 640 at güýjüni we 800 Nm aýlanma güýjüni berýär.
Mansory ulagyň tizligini artdyrma wagty we iň ýokary tizligi barada entek maglumat bermedi, ýöne olaryň hem kämilleşmegine garaşylýar.
