Chevrolet kompaniýasy bir zarýadda iň uzak aralygy geçen elektrik ulagy hökmünde täze dünýä rekordyny goýandygyny mälim etdi. Silverado kysymly pikabynyň batareýa bilen işleýän görnüşi 1704,6 kilometri geçmegi başardy diýip, Motor1 habar berýär. Bu iýul aýynda Lucid Air-niň goýan öňki rekordyndan 500 kilometr töweregi köpdür.
Bu netijäni gazanmak üçin Chevrolet-iň inženerleri bir hepdeläp ýapyk synag meýdançasynda we onuň golaýyndaky jemgyýetçilik ýollarynda synag geçirdiler.
Dogrusy, rekord goýan ulag az-kem üýtgeşmelere sezewar edildi: energiýa sarp edilişini azaltmak üçin sürüjiler sagatda 40 km tizlikden geçmediler we howalandyryş (klimat kontrol) ulgamyny açmadylar.
Pikap, netijeliligini ýokarlandyrmak üçin, birneme üýtgedildi. Ätiýaçlyk teker aýryldy, tekerler iň amatly burçlara sazlandy, tekerler mümkin bolan aňrybaş basyşa çenli çişirildi we howanyň garşylygyny azaltmak üçin ýük platformasy gapak bilen ýapyldy. Bularyň hemmesi elýeterlileriň içinde iň ýeňili bolan Silverado-nyň bazasynda edildi.
Ýöne awtoulagyň hereketlendiriji güýç gurluşy we programma üpjünçiligi üýtgemedi, ýagny nazaryýetde Silverado EV-niň eýeleriniň her biri şol bir netijäni şuňa meňzeş şertlerde gaýtalap biler.
Pikabyň batareýasy 205 kWt⋅s kuwwatyna eýe . Resmi maglumatlara görä, adaty şertlerde modeliň ýöreýiş ätiýaçlygy 792 kilometre deňdir.
