Arheologlar Serteý jülgesiniň (Russiýanyň Smolensk oblasty) torfly oturymly ýerlerinde geçirilen gazuw-agtaryş işleri mahalynda agaçdan ýonulyp ýasalan antropomorf eli tapdylar. Tapyndy Döwlet Ermitažynyň Demirgazyk-Günbatar ekspedisiýasynyň hünärmenleri tarapyndan ýüze çykaryldy.
Tapyndy b.e. öňki V asyryň ahyryna - IV müňýyllygyň başlaryna, ýagny täze daş asyry döwründen bürünç eýýamyna geçiş döwrüne degişlidir. Russiýaly arheologlar munuň ýaly zada öň gabat gelmändirler.
El ussatlyk bilen ýasalypdyr: eliň aýasy nepislik bilen taraşlanan, arkasyna ýedi şöhleli rozetka oýlup salnan. Entek gadymy döwürdekä bu zat zaýalanypdyr - iki barmak döwlüp, çuň kesikler bilen bezelen aýanyň gapdalyna bölekleýin zeper ýetipdir. Goşarda döwük görünýär, bu, hünärmenleriň pikirine görä, penjäniň başga bir zadyň bölegidigini görkezip biler.
Şol medeni gatlakda agaç eliň gapdalynda adamyň şekili bolan gabyň bölegi tapyldy. Arheologlar antropomorf şekilleri bolan täze daş asyrynyň gaplarynyň Gündogar Ýewropanyň tokaý zolagy üçin seýrek duş gelýän zatdygyny bellediler.
