JerryRigEverything YouTube-kanalynyň awtory Zak Nelson Galaxy Z Fold7 modelini ýowuz synagdan geçirenden soň, Samsung-yň eplenýän ýene bir enjamy bolan Galaxy Z Flip7 modelini berklik boýunça synagdan geçirdi.
Flip7 korpusy birnäçe gezek gaňrylsa-da, bökdençsiz işlemegini dowam etdi. Gaňrylanda çykan seslere garamazdan, onuň korpusy, eplenýän ekrany we şarnir mehanizmi zaýalanmady. Şeýle-de, açyk oduň täsiri hem smartfonyň işine zeper ýetirmedi.
Flip7 IP48 gorag derejesine eýe – bu bolsa enjamda tozana garşy çäkli gorag bardygyny aňladýar. Bloger enjamyň eplenýän bölegine çäge sependen soň, açylanda ýeňil hyşyrdy ses peýda boldy. Muňa garamazdan, bu hem onuň işine täsir etmedi.
Smartfonyň daşky ekrany Corning Gorilla Glass Victus 2 aýnasy bilen goralan. Bu aýna çyzylmalara garşy gowy durnuklylyk görkezdi: Moos şkalasy boýunça 6 derejesindäki gural bilen çyzylan mahaly ilkinji yzlar peýda boldy, has çuňňur çyzgylar bolsa 7-nji derejede ýüze çykdy.
Emma içki eplenýän ekran has näzik bolup çykdy – ol eýýäm 2-nji derejedäki gural bilen täsir edilende-de çyzylýar. Hatda barmagyň dyrnagy bilen çyzylan mahalynda hem yz galdy.
Samsung Display kompaniýasy Galaxy Z Flip7-niň eplenýän ekranynyň Galaxy Z Fold7 bilen deňeçer derejede berklige eýedigini öňräk mälim edipdi. Olaryň berýän maglumatyna görä, Fold7 paneli 500 müň eplenme gezegine niýetlenendir, şol sanda –20°C temperaturada 60 müň gezek we +60°C temperaturada 300 müň gezek eplenmäge çydamlydyr.
