NASA Lunar Trailblazer missiýasynyň tamamlanandygyny resmi taýdan yglan etdi. Apprat bilen aragatnaşyk gutarnykly ýitdi diýip hasaplandy. Aýda suwy gözlemek üçin döredilen zond Artemis programmasynyň möhüm bölegi bolupdy. Ol uçurylandan soň bir gün hem geçmänkä aragatnaşyga çykmagyny bes etdi.
Apparat 2025-nji ýylyň 26-njy fewralynda Florida ştatynyň Kennedi kosmos merkezinden Falcon 9 raketasy bilen uçuryldy. Zond 48 minutdan soň raketadan bölünip aýryldy we özbaşdak uçuşa başlady. Kaliforniýanyň Tehnologiýa institutynyň operatorlary uçurylandan bir sagatdan soň onuň bilen aragatnaşyga çykyp bildiler, ýöne ertesi gün aragatnaşyk ýitdi. Hünärmenler aragatnaşyk bolmasa hereketlendirijini işjeňleşdirip we Gün panelleriniň ugruny sazlap bilmediler. Radarlaryň berýän maglumatlaryna görä, enjam uçuş wagtynda pyrlanypdyr, netijede elektrik kuwwatyny ýitiripdir.
Iýul aýynyň ahyryna çenli zond Ýerden gaty uzaklaşdy, indi NASA missiýanyň tamamlanandygyny habar berdi.
Lunar Trailblazer zondy iki gural bilen enjamlaşdyrylypdy: Lunar Thermal Mapper we HVM3. Birinjisi Aýyň ýüzündäki temperaturany ölçemek üçin niýetlenipdi, ikinjisi bolsa suwuň yzlaryny gözlemek üçin serpikýän Gün şöhlesini seljermek üçin niýetlenipdi. Bu missiýa tebigy hemranyň suw buzlarynyň bar bolmak ähtimallygy ýokary bolan polýar sebitlerini öwrenmäge gönükdirilipdi. Bu maglumatlar Aýda hemişelik bazalaryň döredilmegini esaslandyrmak üçin möhüm hasaplanýardy.
