Sony Pictures Animation studiýasy Möý Pank barada täze animasion filmiň üstünde işläp başlady. Taslama Möý adam baradaky giňeldilen multfilm äleminiň bir bölegi bolar diýip, Deadline neşiri habar berýär.
Taslama üçin ssenarini aktýor Deniel Kaluýa we ssenariçi Ajon Singh ýazar. Sýužet barada giňişleýin maglumat entek ýok.
Baş gahrymana ýene-de Kaluýanyň ses bermegine garaşylýar. Ol eýýäm “Möý adam: Älem kerebi” (Человек-паук: Паутина вселенных / 2023) multfilminde bu gahrymana ses beripdi we “Möý adam: Älemden daşary” (Человек-паук: За пределами Вселенной) animasion filminde-de bu keşbe gaýdyp geler.
Möý Pank ilkinji gezek 2015-nji ýylda The Amazing Spider-Man №10 komiksinde peýda boldy. Bu Ýer-138 dünýäsinde hereket edýän supergahryman bolup, ol Piter Parkerden tapawutlylykda, pank-medeniýetiniň stilinde we anarhiýanyň üsti bilen korrupsiýa we adalatsyzlyga garşy göreşýär.
