ABŞ-nyň Prezidenti Donald Tramp ýarym geçirijileriň we farmasewtika önümleriniň importyna amerikan paçlarynyň ep-esli ýokarlanjakdygyny aýtdy. Onuň sözlerine görä, Ştatlara getirilýän derman serişdeleri üçin meýilleşdirilýän paçlar ahyrky netijede 250%-e ýetip biler.
“Ilkibaşda biz farmasewtika üçin uly bolmadyk paç girizeris, ýöne bir ýyldan – aňry gitse bir ýarym ýyldan – ol 150%-e, soňra 250%-e çenli ýokarlanar, sebäbi biz derman serişdeleriniň öz ýurdumyzda öndürilmegini isleýäris” – diýip, Tramp CNBC teleýaýlymyna beren interwýusynda aýtdy.
Şeýle-de, Ak tamyň başlygy tiz wagtdan ýarym geçirijileriň we çipleriň importy üçin gümrük paçlaryny yglan etmekçidigini belledi.
Aprel aýynda Trampyň administrasiýasy farmasewtika önümleriniň importynyň milli howpsuzlyga ýetirýän täsiri barada 232-nji bölümiň çäklerinde derňew işlerine başlady. Bu mehanizm Söwda ministrligine ýurt üçin töwekgelçiliklere baha bermäge we zerur bolan ýagdaýynda çäklendirmeleri girizmäge mümkinçilik berýär.
Bilermenler Trampyň kompaniýalaryň derman önümçiligini ABŞ-a geçirmegini gazanmak isleýändigini belleýär. Soňky onýyllyklarda derman serişdeleriniň içerki önümçiligi ep-esli peseldi.
Şunuň bilen baglylykda, Eli Lilly we Johnson & Johnson ýaly uly farmasewtika kompaniýalary eýýäm ABŞ-daky önümçilige täze maýa goýumlary yglan etdi.
Şol bir wagtyň özünde, hünärmenler şeýle ýokary paçlaryň çykdajylary artdyryp, üpjünçilik zynjyryna zyýan ýetirip biljekdigini we hassalar üçin dermanlaryň elýeterliligine täsir edip biljekdigini duýdurýar. Pudagyň hünärmenleriniň pikiriçe, bahalary düzgünleşdirmek syýasaty kompaniýalaryň girdejilerini çäklendirip, ylmy gözleglere maýa goýumlary togtadyp biler.
