Saud Arabystany ýagyş suwuny ýygnamak üçin 1000 sany bent gurmagy meýilleşdirýär. Bu barada metbugat ýygnagynda ýurduň daşky gurşaw, suw gorlary we oba hojalygy ministri Abdurahman Al-fadli mälim etdi diýip, Ahbaar24 neşiri habar berýär.
Onuň sözlerine görä, täze desgalar ýylda 4 million kub metre çenli suwy toplap biler.
Ministr ýurduň suw pudagynda jemi 61,3 milliard dollarlyk iri taslamalaryň durmuşa geçirilýändigini aýtdy. Dürli kuwwatly bentler möwsümleýin ýagyşlary ýygnap, ýerasty suw gorlaryny doldurar, ýerüsti suw akymlaryny azaldar we gurak ýerleri suw bilen üpjün eder. Ol bu taslamanyň suw gorlaryny uzak möhletleýin tygşytlamak üçin möhüm ädim hökmünde görülýändigini belledi.
Al-Fadhliniň hasabatyna görä, ýurduň suw önümçiligi eýýäm iki esse artdy, şonuň 75%-i süýjedilen deňiz suwuna degişlidir. Saud Arabystany deňiz suwundan alynýan süýji suwuň mukdary boýunça dünýäde birinji orny eýeleýär. Şeýle-de, gaýtadan ulanylýan suwuň mukdary iki esse artyp, 32% -e ýetdi.
Howa bilen bagly başlangyçlarynyň çäginde ýurt 2030-njy ýyla çenli kömürturşy gazynyň zyňyndylaryny azaltmagy, 10 milliard agaç ekmegi we zeper ýeten tebigy zolaklary dikeltmegi maksat edinýär.
Ministr “Ýaşyl Saud Arabystany” maksatnamasynyň çäklerinde 500 müň gektardan gowrak zaýalanan ýerleriň eýýäm dikeldilendigini we 151 million agaç nahalynyň oturdylandygyny belledi. Hökümet 2030-njy ýyla çenli 2,5 million gektar meýdany dikeltmegi we ekilen agaçlaryň sanyny 215 milliona ýetirmegi meýilleşdirýärler. Maksatnamanyň umumy maksady - 40 million gektar meýdanda 10 milliard agaç ekmek.
