Soňky 12 aýyň dowamynda Finlýandiýanyň paýtagty Helsinkide ýol-ulag hadysalary sebäpli ýekeje-de ölüm hadysasy hasaba alynmady. Bu barada şäher häkimligine we polisiýa gullugyna salgylanyp, Yle neşiri habar berýär.
Helsinkide soňky gezek adam pidasyna getiren ýol-ulag hadysasy 2024-nji ýylyň iýul aýynyň başynda bolupdy.
Ulag inženeri Roni Utrianeniň aýtmagyna görä, şeýle oňyn statistika ýol tizlikleriniň çäklendirilmegi bilen gönüden-göni baglanyşykly. Häzirki wagtda şäher köçeleriniň ýarysyndan gowragynda iň ýokary tizlik 30 km/sagat bilen çäklendirilendir. Täze okuw ýylynyň başlamagy bilen bu düzgün ähli mekdepleriň töwereginde hem ornaşdyrylar.
Geçirilen çäreleriň arasynda köçeleriň dizaýnynyň üýtgedilmegi hem möhüm täsir etdi. Soňky ýyllarda Helsinkide pyýadalar we welosiped sürüjileri üçin infrastruktura gowulandyryldy, täze wideo kameralar we awtomatlaşdyrylan gözegçilik ulgamlary ornaşdyryldy. Mundan başga-da, şäherde jemgyýetçilik ulaglarynyň netijeli ulgamy öz maşynlaryny ulanmak zerurlygyny azaldýar.
Şeýle hem häzirki zaman awtoulaglarynyň we beýleki şahsy ulaglaryň howpsuzlygynyň ýokarlanandygy bellenilýär.
Oňyn statistika diňe bir ölüm derejesine däl-de, eýsem ýol hadysalarynyň umumy sanyna hem degişli. Ilaty 690 müň adam bolan şäherde geçen ýylyň dowamynda bary-ýogy 277 sany şikes bilen gutaran ýol hadysasy hasaba alyndy. Bu 1980-nji ýyllaryň ahyryndaky 1000 töweregi hadysa we ýylda 30 adam pida bolan döwür bilen deňeşdirilende ep-esli pesdir.
Utrianen bu netijeleri birnäçe ýyllyk ulgamlaýyn işleriň netijesi diýip atlandyrdy. Ol Helsinkiniň ýol hadysalarynda pyýadalaryň ölüm derejesini nola ýetirmegi ilkinji gezek 2019-njy ýylda başardandygyny ýatlatdy.
