Apple kompaniýasy Hytaýyň Dalýan şäherindäki flagman dükanynyň ýapyljakdygyny mälim etdi. Ol 9-njy awgustda işlemegini bes eder diýip, 21st Century Business Herald gazeti habar berdi.
Dükan 2015-nji ýylyň oktýabrynda açylyp, amerikan tehnologiýa ägirdiniň Dalýanda ilkinji we Lýaonin welaýatynda ikinji resmi dükany bolupdy. Kompaniýa onuň ýapylmagynyň sebäbini aýtmady.
Çözgüt kompaniýanyň 2025-nji ýylyň ikinji çärýegindäki maliýe netijeleri belli bolan wagty kabul edildi. Apple-iň girdejisi 5% ýokarlanyp, 95,36 mlrd dollara ýetdi, ýöne materik Hytaýda görkezijiler 2% peselip, 16 mlrd dollar boldy.
IDC analitikleri munuň sebäbi hökmünde bäsdeşligiň güýçlenmegini belleýär. 2025-nji ýylyň ikinji çärýeginde Huawei Hytaýyň smartfon bazaryny 12,5 mln smartfon bilen üpjün edip we bazaryň 18,1%-ini eýeläp, öňdebaryjy boldy. Apple 13,9% paý bilen bäşinji orunda ýerleşdi. Ol Vivo, OPPO we Xiaomi ýaly brendlerden yza galdy. 2024-nji ýylyň dördünji çärýeginde Apple 17,4% paý bilen birinji orny eýeläpdi.
Häzirlikçe Dalýandaky dükanyň ýapylmagynyň aýratyn bir waka ýa-da kompaniýanyň hytaý bazary üçin strategiýasyndaky uly üýtgeşmeleriň bir bölegi boljakdygy belli däl.
