OpenAI-iň baş direktory Sem Altman ChatGPT bilen ýazyşylan gürrüňdeşlikleriň kazyýetiň talaby boýunça görkezilip bilinjekdigini aýtdy. Bu barada ol Teo Wonuň podkastynda habar berdi.
Altman barha köp ulanyjynyň ChatGPT bilen şahsy aladalaryny we syrlaryny paýlaşyp, ondan maslahat soraýandygyny aýtdy. Olar çat-bota şahsy terapewt ýaly ýüz tutýar, çünki neýroulgam ýazgarmaýar-da, goldaýar we çözgüt tapmaga kömek edýär.
Şol bir wagtyň özünde, ol şahsy ýa-da psihologik temadan şeýle gürrüňleriň lukmançylyk ýa-da aklawçy syry bilen goralmaýandygyny belledi. EA bilen söhbetler gizlinlik baradaky kanunyň goragyna düşmeýär we ýörite gulluklaryň, döwlet edaralarynyň ýa-da hukuk goraýjy edaralaryň talaby bilen görkezilip bilner.
Şonuň üçin Altman çat-bota şeýle şahsy temalar bilen ýüzlenmezden ozal “gowja pikirlenmäge” çagyrdy.
“Eger siz ChatGPT bilen şahsy meseleleriňiz barada gürleşýän bolsaňyz, soňundan kazyýet işi ýa-da şolar ýaly bir zat ýüze çyksa, bizi ony görkezmäge borçlandyryp bilerler, meniň pikirimçe, bu nädogry. Men biziň EA bilen gatnaşykda psihoterapewt ýa-da başga biri bilen gürrüňdeşlikde bolşy ýaly gizlinlik konsepsiýamyz bolmaly diýip pikir edýärin. Bir ýyl mundan ozal bu barada hiç kim pikir hem etmändi” – diýip, Altman belledi.
ChatGPT-niň syýasatyna laýyklykda, ulanyjy tarapyndan bozulan çat-bot bilen ähli söhbetdeşlikler, eger kompaniýa olary “hukuk esaslary ýa-da howpsuzlyk maksady bilen” saklamaga borçlanmasa, 30 günüň içinde gutarnykly ýok edilýär. Şol bir wagtyň özünde, OpenAI-iň işgärleri modeli kämilleşdirmek we betpäl ulanylyşy anyklamak üçin ýazyşylan söhbetleri okap biler.
