The New York Times 2025-nji ýylda baryp görmeli ýerleriň ýyllyk sanawyny hödürledi. Oňa hem işjeň medeni durmuşy bolan şäherler, hem o diýen belli däl ugurlar girdi.
Merkezi Aziýa we Kawkaz şäherleriniň arasynda neşir Buharany (Özbegistan) maslahat berýär. Bu ýerde güýzde häzirkizaman sungatynyň biennalesi geçiriler. Sergi taryhy ýerlerde – medresede, kerwensaraýlarda we beýleki binagärlik ýadygärliklerinde geçer. Oňa gatnaşyjylaryň arasynda Entoni Gormli we Laýla Goar ýaly dürli ýurtlardan tanymal hudožnikler bar.
Gazet Gruziýada Kutaisi şäherine baryp görmegi teklip edýär. Şu ýyl şäherde öňki patyşalyk rezidensiýasynyň binasynda sanly muzeý, şeýle-de däp bolan tanslar we aýdymlar bilen medeni merkez açyldy. Şäheriň Gara deňze we Kawkaz daglaryna golaý bolmagy bu ýeriň özüne çekijiligini hasam artdyrýar.
Balkan sebitiniň ýurtlarynyň arasynda ýakynda Şengen zolagyna goşulan Bolgariýa aýratynlandyrylýar. The NYT syýahata Sofiýadan başlamagy, soňra Plowdiw şäherine, Gara deňziň kenaryna ýa-da “Rila” milli seýilgähine baryp görmegi teklip edýär.
Şeýle-de, gazet baý binagärligi we fadu aýdym-saz däbi bolan Portugaliýadaky gadymy uniwersitet şäheri Koimbru ünsi çekýär. Şäherden uzak bolmadyk ýerde, Kabanaş-de-Wiriatuda Ikinji jahan urşy döwründe ýewreýleri halas eden diplomatyň hormatyna muzeý açyldy.
Mundan başga-da, neşir Fransiýadaky we Nepaldaky gyzykly medeni taslamalar, Nikaraguadaky we Grenlandiýadaky täzelenen transport ugurlary, Galapagosda tebigaty goramak boýunça alnyp barylýan çäreler we “Ak lotos” filminiň düşürilişinden soň Samui adasynda syýahatçylygyň ösüşi barada gürrüň berdi.
