ABŞ-da öý şertlerinde deriniň rak keselini anyklap bilýän mikro iňňeli silikon plastyr işlenip taýýarlandy. Bu barada Biosensors we Bioelektronika ylmy žurnalynda habar berildi.
Enjam syçanlarda we doňuzlarda geçirilen synaglardan üstünlikli geçip, melanomany howply däl çişlerden tapawutlandyrmaga ukyplydygyny görkezdi.
Plastyr ýyldyz şekilli mikro iňňeli silikon esasdan ybarat. Iňňeleriň uzynlygy 0,6 mm we ini 0,01 mm-den hem kiçi. Olaryň uçlary DNK-nyň we RNK-nyň böleklerini saklaýan mikroskopik köpürjikler bolan ekzosomalary çykarýan gel bilen örtülendir. Bu gurluşlar heniz biopsiýa edilmänkä ýa-da gan barlagy geçirilmänkä çişiň bardygyny görkezip biler.
Awtorlaryň sözlerine görä, plastyryň iňňeleri agyry döretmeýär we deriniň ýokarky gatlagyndan aşak çümmeýär. Ulanylandan soň, plastyry deriden aýyrmaly we ýörite kislota çümdürmeli, şonda gel hem, ekzosomalar hem ergine öwrülýär. Soňra emele gelen nusga synag zolajygyny çümdürmeli: eger suwuklykda melanomanyň ekzosomalary bar bolsa, zolakda iki setir peýda bolar, ýogsamam - biri. Bu mehanizm COVID-19 üçin niýetlenen çalt synagyň işleýşine meňzeş.
Işläp taýýarlama Miçigan uniwersitetiniň hünärmenleri tarapyndan döredildi. Indiki tapgyrda adamlarda synag geçiriler. Synag şowly bolan ýagdaýynda plastyr erkin satuwa çykarylar.
Şeýle hem, alymlar tehnologiýany rak keseliniň beýleki - öýkeniň, süýt mäzleriniň, içegäniň, beýniniň we peşew mäziniň rak keselleri ýaly görnüşlerini tapmak üçin uýgunlaşdyrmagy meýilleşdirýärler.
