ABŞ-nyň Milli aeronawtika we kosmos giňişliginiň barlaglary dolandyryş gullugy (NASA) 3870 töweregi işgäriň işden çykarylýandygyny habar berdi, bu bolsa işgärleriň umumy sanynyň 20%-ini düzýär. Şolar işden aýrylandan soň agentligiň işgärleri 18 000-den 14 000 adama çenli azalar.
NASA işgärleriň köpüsiniň agentlik bilen baglaşylan şertnama laýyklykda meýletin gidýändigini belleýär. Bu çäreler ABŞ-nyň Prezidenti Donald Trampyň administrasiýasy tarapyndan federal işgärleriň sanyny azaltmak boýunça durmuşa geçirilýän meýilnamanyň bir bölegidir. Şol bir wagtyň özünde, Ak tamyň agentlige berilýän serişdeleri azaltmak babatyndaky synanyşyklary entek amala aşyrylmady - NASA-nyň býujeti şol öňki derejesinde galýar.
Iýul aýynyň başynda NASA-nyň häzirki we öňki 300 töweregi işgäri Ak tamyň we NASA-nyň ýolbaşçylaryny tankytlaýan açyk hata gol çekipdi. Onda hökümetiň "weýrançylykly hüjümleriniň" kosmos barlaglarynda NASA-nyň "dünýäde öňdebaryjy bolmak ukybyna howp salýandygy" bellenýär.
NASA-nyň içerki resminamalary bilen tanşan Politico neşiri, işgärleri şeýle uly möçberde azaltmagyň Amerikanyň kosmos maksatnamalarynyň birnäçesine, şol sanda Aýa we Marsa uçmak boýunça taslamalaryna täsir edip biljekdigini habar berdi.
