Bezýe şäheriniň häkimi Rober Menar Rim imperiýasy döwrüniň şäheriniň, takmynan, b.e. 30-njy ýylyndaky keşbini gaýtadan dikeltmäge gönükdirilen Béziers Antique taslamasyny hödürledi.
30 ýyla niýetlenen taslama diňe gadymy rim gurluşyk tehnologiýalaryny ulanmagy göz öňünde tutýar.
“Biz Bezýeni miladynyň 30-njy ýylynda bolşy ýaly gaýtadan gurarys” – diýip, Menar Ici Hérault neşiri bilen söhbetdeşlikde aýtdy.
Häkimiň bellemegine görä, gadymyýetiň aýdyň yzlarynyň ýokdugyna garamazdan, şäherde heniz hem aýry-aýry artefaktlar saklanyp galypdyr.
Işler üç tapgyrda alnyp barlar, gurluşyk meýdançalary bolsa köpçülik üçin açyk bolar. Birinji tapgyr (2025-2030) amfiteatryň, ussahanalaryň we bilim merkezleriniň gurluşygyny öz içine alýar. Ikinjisi (2031-2040) medeni we taryhy desgalary goşar. Ahyrky tapgyr (2041-2055) halkara çäreler bilen tamamlanar.
Bu pikiri durmuşa geçirmek üçin 35 hünärmen işe alnar. Olara gadymy senetçilik – daşy işlemek, mozaikalary döretmek we demir işi öwrediler. Umumy býujet 13 mln ýewro bolar we şolardan 3 mln döwlet tarapyndan maliýeleşdirilýär.
Taslama Fransiýanyň iň gadymy şäheri hökmünde belli bolan Bezýeniň taryhy köklerini janlandyrmaga gönükdirilendir. Ol, çen bilen, b.e.öň VII asyrda döredilipdir. Şäherde köp sanly taryhy ýadygärlikler bar: gadymy amfiteatr, Keramatly Nazariniň ybadathanasy (VIII asyrdan bäri agzalýar), Keramatly Madlen buthanasy (XI asyr) we Günorta kanal (XVII asyr).
