Ženewada BMG-niň ştab-kwartirasynda geçen AI For Good sammitinde Karl III-niň adam şekilli robot Ai-Da tarapyndan döredilen portreti görkezildi. Bu barada Sky News habar berýär.
Algorithm King diýlip atlandyrylan surat robotyň “gözünde” oturdylan kameralardan alnan suratlaryň esasynda ýagly reňkler bilen çekildi. Ai-Da elleriniň ornuny tutýan bionik protezi ulandy.
2019-njy ýylda döredilen Ai-Da roboty daşky görnüşi boýunça aýala meňzeýär we 1842-nji ýylda hasaplaýyş maşyny üçin ilkinji programmany düzen iňlis matematigi Ada Lawleýsiň hormatyna atlandyryldy. Ai-Da emeli aňyň ösen dil modeli bilen üpjün edildi, bu hem oňa aragatnaşyk gurmaga mümkinçilik berýär.
Sammitde hatda robota söz berildi.
“Meniň üçin BMG-de, tehnologiýalaryň we medeniýetiň geljegini döredýän adamlaryň arasynda bu ajaýyp wakanyň bir bölegi bolmak uly hormat. Onuň Alyhezretleri patyşa Karl III-niň portretini hödürlemegim – bu diňe bir döredijilik däl, bu jemgyýetimizde EA-nyň rolunyň üýtgeýändigini we emeli aňyň medeni landşafty döredýändigini görkezmegiň usulydyr” – diýip, ol aýtdy.
Beýik Britaniýanyň ilçisi we BSG-niň hem Ženewada BMG-niň ýanyndaky hemişelik wekili Saýmon Menli “Ai-Da-nyň diňe bir tehnologiýa täsinligi däl-de, medeni söhbetdeşlik üçin sebäpdigini” belledi. Ol britan innowasiýalaryna haýran galýandygyny aýdyp, täze tehnologiýalaryň sungat, etika we şahsyýet baradaky global dialoga ýardam etmegine umyt bildirdi.
