Birleşen Milletler Guramasynyň ýanyndaky Bütindünýä syýahatçylyk guramasynyň (UN Tourism) maglumatlaryna görä, halkara syýahatçylygy 2024-nji ýylda pandemiýadan öňki derejesine ýetdi, ýagny dünýäde syýahatçylaryň sany 1,47 milliard boldy. Şeýle hem bu gurama, gelýän halkara gatnawlaryň sanyna baglylykda iň köp syýahat edilýän 20 ýurduň sanawyny neşir etdi.
102 million syýahatçy bilen sanawda Fransiýa birinji ýerde durýar. Geçen ýyl ýurtda syýahatçylyk akymynyň ösmegine Parižde geçirilen Olimpiýa oýunlary täsirini ýetirdi. Bir ýylyň dowamynda Fransiýa gelen adamlaryň sany bütin Müsüriň ýa-da ýigrimi Omanyň ilaty bilen barabar boldy.
Sanawda Ispaniýa ikinji orunda (93,8 million) durýar. Iň meşhur ýerler Barselona, Madrid, Sewilýa, Maýorka, Ibisa we Kanar adalary boldy, şonuň bilen bir wagtda ýerli ilatyň köpçülikleýin syýahatçylyga garşy nägileligi barha artýar.
Iň köp barylýan ýurtlaryň hatarynda ABŞ (72,4 million) hem bar. Amerikanyň Birleşen Ştatlary, adatça, Nýu-Ýork, Los-Anželes we Las-Wegas ýaly uly şäherleri bilen syýahatçylary özüne çekýär, ýöne 79,4 million adamyň baryp gören 2019-njy ýyly bilen deňeşdirilende, bu ýurduň eýeleýän orny peseldi. Trampyň administrasiýasynyň syýasaty sebäpli gelýänleriň sany mundan buýana-da azalsa gerek diýip, UN Tourism-de bellediler.
2024-nji ýylda dünýäde iň köp syýahat edilen 20 ýurt:
- Fransiýa (102 million syýahatçy);
- Ispaniýa (93,8 million);
- ABŞ (72,4 million);
- Türkiye (60,6 million);
- Italiýa (57,9 million);
- Meksika (45 million);
- Hytaý (40 million);
- Beýik Britaniýa (39 million);
- Germaniýa (37,5 million);
- Ýaponiýa (36,9 million);
- Gresiýa (36 million);
- Tailand (35,5 million);
- Awstriýa (32,2 million);
- Birleşen Arap Emirlikleri (30,5 million);
- Saud Arabystany (29,7 million);
- Portugaliýa (28,2 million);
- Malaýziýa (25 million);
- Gonkong (21,9 million);
- Niderlandlar (21,3 million);
- Hindistan (20,6 million).
Lider bilen sanawdaky soňky 20-nji ornuň arasyndaky boşluk 80 milliondan gowrak adam.
Ýaponiýa syýahatçylyk akymynyň iň uly ösüşini görkezdi - 2023-nji ýyl bilen deňeşdirilende plýus 47%. Tailandda (+ 26,3%) we Gonkongda (+ 27,9%) syýahatçylaryň sany ep-esli köp boldy.
