Arheologlar Sisiliýanyň günorta-gündogar kenar ýakasynda bogaldagy we urgany saklanyp galan gark bolan gadymy grek gämisini tapdylar. Gämi b.e. öňki VI–V asyrlarda gark bolupdyr diýip, LBV portaly habar berýär.
Gämi Raguza welaýatynyň Ispika şäheriniň düzümine girýän Santa-Mariýa-del-Fokallo obasynyň golaýyndan tapyldy. Gazuw-agtaryş işleri Udine uniwersitetiniň ynsanperwer ylymlary fakulteti tarapyndan Deňziň medeni we daşky gurşaw mirasy müdirligi bilen bilelikde alnyp barylýar. Bu iş arheolog S.Tusanyň we professor M.Kapulliniň başlangyjy bilen 2017-nji ýylda başlanan “Kaukana” taslamasynyň çäklerinde geçirilýär.
Gämi 6 metr çuňlukda bolup, uzak wagtlap çägäniň we daşlaryň aşagynda ýatypdyr. Geçen ýyl arheologlar ony arassalap başladylar. Soňky gezek suwa çümen wagtlarynda gazuw işlerini ýene iki metr çuňlaşdyrypdyrlar we galyndylary doly arassalapdyrlar.
Tapyndylaryň arasynda gara şekilli keramika, "Nau" ("gämi") sözi bilen ýazylan adaty bolmadyk küýze we gäminiň merkezi bölegini öz içine alýan gurluş elementleri bar.
Maý aýyndan iýun aýyna çenli barlagçylar topary gäminiň 3D modelini döretdi. Şeýle hem, ýerli balykçy we guwwas A. Juntanyň görkezmeginde deňiz düýbüniň ýanaşyk ýerlerini öwrendiler.
Taslama kino pudagynyň ünsüni özüne çekdi. Ikinji barlag kampaniýasyny bölekleýin Sunk Costs Productions maliýeleşdirdi. Ol Martin Skorsezäniň Sikelia Productions-y bilen bilelikde “Sisiliýada gämi heläkçiligi” (“Кораблекрушение на Сицилии”) atly dokumental filmiň üstünde işleýär. Filmiň surata düşüriş topary gazuw-agtaryş işleriniň möhüm pursatlaryny surata düşürdi.
"Bu açyş Sisiliýanyň suwasty mirasynyň gymmatyny nygtaýar " - diýip, Sisiliýanyň medeni miras boýunça geňeşçisi F.P.Skarpinato nygtady.
