Google Berklidäki Kaliforniýa uniwersiteti bilen bilelikde Android smartfonlaryny ýertitremeleri anyklaýan iň uly tora öwürdi. Ol 98 ýurtda 2,5 mlrd adamy gurşap alýar diýlip, Science žurnalyndaky ylmy gözlegde aýdylýar.
Android Earthquake Alerts ulgamy smartfonlardaky seýsmik tolkunlar üçin häsiýetli bolan hereketleri bellige alýan akselerometrleri ulanýar. Google-yň algoritmleri birnäçe gurluşlardan alnan maglumatlary seljerip, ýer sarsgynlaryny gurluşyk işleri ýaly beýleki wibrasiýalardan tapawutlandyrýar.
Üç ýylyň içinde, 2021-nji ýylyň aprelinden 2024-nji ýylyň marty aralygynda ulgam 1,9-dan 7,8 bal ululykdaky 11 000-den gowrak ýertitremäni hasaba alyp, adaty seýsmik stansiýalar bilen deňeçer takyklykda duýduryş iberdi. Ortaça her aýda 312 ýertitreme hasaba alyndy, duýduryşlaryň 85%-i hünärmenler tarapyndan tassyklandy.
Ulgam gymmat monitoring stansiýalarynyň elýeterli bolmadyk seýsmik taýdan howply sebitlerinde aýratyn gymmatlydyr. Ol Android gurluşlarynyň köpüsinde Google Play arkaly awtomatik işleýär.
2023-nji ýylyň fewralynda ulgam Türkiýede bolan 7,8 bal ululykdaky ýertitreme wagtynda uly synagdan geçdi. Ilkibaşda ol sarsgynlaryň güýjüni 4,5 bal ýaly kabul etdi. Kämilleşdirilenden soň ulgam 6,3 sekuntda 7,4 bal ululygy kesgitläp, 67 mln adama öňünden duýdurdy. Nepalda 5,7 bal ululykdaky ýertitreme wagtynda ulgam 10 mln duýduryş iberdi, käbirleri adam sarsgyny duýmazdan 60 sekunt öň iberildi.
Tehnologiýa smartfonlaryň ýertitremeler barada öňünden duýdurmak üçin elýeterli çözgüt bolup, adaty ulgamlaryň işlemeýän ýerinde adam ömürlerini halas edip biljekdigini görkezýär.
