Leonardo DiKaprio Netflix üçin “Kapitan Planeta” serialynyň ýerine ýetiriji prodýuseri bolar. Taslama aktýor tarapyndan esaslandyrylan Appian Way prodakşn-kompaniýasy tarapyndan durmuşa geçirilýär diýip, Deadline neşiri ýazýar.
Serialy döretmek işine Greg Berlantiniň Berlanti Productions we Warner Bros. Television kompaniýalary hem gatnaşýar. Ssenarini ozal “Hanym Dewis” serialynyň üstünde işlän Tara Ernandes ýazar.
Serial 1990-njy ýyldan başlap TBS teleýaýlymynda çykan “Kapitan Planetanyň halasgärler topary” animasion taslamasyna esaslanar. Alty möwsümiň dowamynda multserial Kapitan Planeta atly supergahrymanyň kömegi bilen ekologiýa betbagtçylyklary bilen göreşýän bäş ýetginjek barada gürrüň berdi.
Ozal Appian Way “Kapitan Planetanyň” esasynda doly metražly film çykarmagy meýilleşdiripdi. Taslama 2016-njy ýylda Paramount Pictures studiýasy tarapyndan yglan edildi. Ssenariçiler hökmünde onuň üstünde Glenn Pauell we Jono Mett işledi, ýöne film barybir düşürilmedi.
Gahryman üçin hukugy ahyrynda Warner Bros. Discovery aldy. Pauell indi taslama gatnaşmaýar, ýöne KHBS-iň maglumatlaryna görä, Jono Mett serialyň prodýuserleriniň biri bolar. Ýerine ýetiriji prodýuserler hökmünde Leonardo DiKaprio, Jennifer Dewisson, Sara Şehter we Li London Redman çykyş eder.
Belläp geçsek, DiKaprionyň özi, aktýorlyk işinden başga-da, daşky gurşawyň işjeň goragçysy hökmünde tanalýar. Ol eýýäm ençeme ýyl bäri ekologiki çäreler bilen meşgullanýar, bioköpdürlüligi saklamak we klimatyň üýtgemegi bilen bagly meseleleri çözmek üçin gazna döretdi, şeýle-de ekologiýa meseleleri boýunça BMG-niň parahatçylyk boýunça ilçisidir.
