19-njy iýulda Türkmenistanyň Jemgyýetçilik guramalarynyň merkezinde çeper elli zenanlaryň arasynda yglan edilen «Gülüň owadan!» atly bäsleşigiň jemleýji tapgyry geçirildi. Bäsleşigi Türkmenistanyň Zenanlar birleşiginiň Merkezi geňeşi, Kärdeşler arkalaşyklarynyň Milli merkezi hem-de ÝUNESKO-nyň işleri barada Türkmenistanyň milli toparynyň sekretariaty bilelikde gurady.
Bäsleşige onuň şäher hem-de welaýat tapgyrlarynda ýeňiji bolan, hersi iki adamdan ybarat toparlar gatnaşdylar. Aşgabat we Arkadag şäherleriniň, ýurdumyzyň welaýatlarynyň çeper elli zenanlary jemleýji tapgyryň birinji şertine laýyklykda, türkmen milli keçesini taýýarlamak bilen baglanyşykly işler barada gyzykly we täsirli gürrüň berdiler. Keçäniň taýýarlanylyşy ýüň saýlap almak we saýmak, ony daramak, boýamak, pişge ýasamak, keçäniň gamşyny dokamak ýaly işleri öz içine alýar.
Ikinji şerte laýyklykda, oňa gatnaşyjylar ýurdumyzyň sebitlerine mahsus aýratynlykda milli nagyşlar bilen keçe güllediler. Salynýan nagyşlar dakylan atlary, zehiniň we döredijilikli zähmetiň sazlaşygynda ajaýyp sungat eserini döredýändigi bilen tapawutlanýar. Şolaryň käbiri «ak tüýnük», «gyzyl tüýnük», «gözenek», «saýlan», «gülýaýdy», «sekiz goçak», «gelinbarmak», «gapyrga», «öküz oňurga», «gonjuk», «hindi goçak», «içýanagyz», «tazyguýruk», «saýlap», «barmak» diýlip atlandyrylýar.
Üçünji şertde bäsleşige gatnaşyjylar keçe bilen baglanyşykly taryhy maglumatlary, yrymlary, nagyşlaryň, gülleriň taryhyndan gürrüň berýän gadymy rowaýatlarydyr beýleki halk döredijilik eserlerini ýerine ýetirdiler.
Emin agzalarynyň beren bahasyna laýyklykda, bäsleşigiň jemleýji tapgyrynyň baş baýragyna Daşoguz welaýatyndan gelen zenanlar mynasyp boldular. Birinji orna Arkadag şäheriniň we Mary welaýatynyň wekilleri mynasyp görüldi. Ikinji orna Lebap welaýatyndan, üçünji baýrakly orna bolsa Aşgabat şäherinden, Ahal we Balkan welaýatlaryndan gelen çeper elli zenanlar eýe boldular.
Ýeňijiler Türkmenistanyň Zenanlar birleşiginiň Merkezi geňeşi, Kärdeşler arkalaşyklarynyň Milli merkezi hem-de ÝUNESKO-nyň işleri barada Türkmenistanyň milli toparynyň sekretariaty tarapyndan Hormat hatlara we gymmat bahaly sowgatlara mynasyp boldular.
