Quacquarelli Symonds (QS) analitik agentligi talyplar üçin dünýäniň iň gowy 150 şäheriniň ýyllyk reýtingini hödürledi. Birinji orny iň ýokary 100 baly alan Seul eýeledi.
QS Best Student Cities reýtingine girmek üçin şäher ilatynyň azyndan 250 müň adam bolmagyny we global QS reýtingine girýän azyndan iki uniwersitetiniň bolmagyny göz öňünde tutýan talaplara laýyk gelmeli. Şeýle-de, sanawy düzüjiler howpsuzlyk, şäher gurşawynyň hili, talyplar üçin özüne çekijiligi, ýaşamagyň we okamagyň elýeterliligi hem-de okuw gutarandan soň işe ýerleşip bilmek mümkinçiligi ýaly ölçegleri hasaba alýar.
Günorta Koreýanyň paýtagty talyplar üçin elýeterlilik derejesiniň ýokary bolmagy netijesinde iň gowusy diýlip saýlandy. Seul ähli esasy ugurlar – howpsuzlyk, şäher gurşawynyň hili we talyplaryň kanagatlanma derejesi boýunça ýokary netijeleri görkezdi.
Reýtingde ikinji orny Tokio (99,9 bal), üçünji orny London (98,1 bal) eýeledi. Ýapon paýtagty ýokary akademiki derejesi we işe ýerleşmek üçin giň mümkinçilikleri bilen tapawutlanýar. Ozal yzygider alty ýyl reýtingiň başyny çeken London ýaşaýyş elýeterliligi boýunça pes baha almagy (bary-ýogy 12,6 bal) sebäpli öňdebaryjylygyny ýitirdi.
Şeýle-de, iň gowularyň ilkinji onlugyna Mýunhen (96,3), Melburn (95,7), Sidneý (94,7), Berlin (93,3), Pariž (93,3), Sýurih (91,5) we Wena (90,8) girdi.
Ilkinji ýigrimilikde orunlaryň ýarysyny Aziýa-Ýuwaş umman sebitiniň şäherleri eýeledi, bu bolsa, analitikleriň pikiriçe, sebitiň dünýä bilimine täsiriniň artýandygyny görkezýär.
Amerikan şäherleriniň arasynda iň gowusy 15-nji orny eýelän Boston boldy. Nýu-Ýork 23-nji, San-Fransisko 41-nji orunda ýerleşýär. Mundan başga-da, top-50-ä Los-Anjeles, Çikago we Waşington girdi. Sanawda Russiýanyň ýekeje şäheri-de ýok. Merkezi Aziýa ýurtlaryndan bolsa Almaty (91-nji orun) we Bişkek (138-nji orun) bar.
