Angliýanyň günorta-günbatarynda, Kornuoll graflygyndaky Tintagel galasynyň harabalygyndan uzak bolmadyk ýerde kanadaly bir syýahatçy maňlaý böleginden bir uly şah çykyp duran kellaçanagy tapdy diýip, Daily Mail habar berýär.
Tintagel galasy britan medeniýetinde belli patyşa Arturyň doglan we ýaşlygynyň geçen ýeri hasaplanýar. Arturyň bolandygy barada ygtybarly taryhy maglumatlaryň ýokdugyna garamazdan, onuň obrazy halk döredijiliginde britleriň goragçysy hökmünde orun aldy. Rowaýatlar patyşany XIV asyryň sowutdan harby esbaply rysary hökmünde suratlandyrýar, bu hem onuň çak edilýän ýaşan döwrüne – V asyryň ahyry bilen VI asyryň başyna gabat gelmeýär.
Artur bilen bagly mifleriň biri galanyň töweregini biynjalyk edip, ötegçilere topulan ýekeşah barada gürrüň berýär. Ahyrynda ýaş patyşa ony öldürmeli bolýar, ýöne ýekeşah ölmezinden öň Arturyň bu etmişi bilen tutuş patyşalygy nälete sezewar etjekdigini aýdýar.
Syýahatçynyň özi tapyndynyň hakykylygyna şübhelenýär we kelleçanagyň kimdir biriniň bilgeşleýin hereketidigini çaklaýar. Onuň bilen Kembrij uniwersitetiniň paleontology Dewid Norman hem ylalaşýar – alymyň pikiriçe, bu poniniň kelleçanagy bolup, oňa sygryň şahy dakylypdyr.
Kelleçanagy ýerli Jadygöýlik muzeýine bermek synanyşygy muzeýiň işgärlerini gyzyklandyrmady. Syýahatçy tapyndyny Solsberiniň golaýyndaky “Stounhenj” myhmanhanasynda goýup gaýtdy. Indi ol bu ýerde interýer bezegi bolup hyzmat edýär.
