Kanadanyň Alberta welaýatynda ýerleşýän SunRise ýaşaýyş toplumy Gün panellerinden emele gelen ägirt uly mural mynasybetli Ginnesiň rekordlar kitabyna girdi. Adaty bolmadyk freska binanyň öň tarapynda 3205 inedördül metri tutýar diýip, Interesting Engineering ýazýar.
Installýasiýa sungaty bina birleşdirilen fotogalwaniki (BIPV) ulgamlar bilen utgaşýar. Bu ýaşaýyş jaý toplumynyň umumy zolaklaryny 267 kWt energiýa bilen üpjün etmäge mümkinçilik berýär.
Freska suratkeş Lans Kardinal tarapyndan döredilip, ol ýerli halkyň we Hytaý diasporasynyň medeniýetine bagyşlanýar.
SunRise taslamasy Mitrex, Avenue Living Asset Management, MBC Group we Chandos Construction bilen bilelikde amala aşyryldy.
“BIPV tehnologiýasynyň we sungatyň birleşmegi könelip barýan binany durnuklylygyň, medeni buýsanjyň we şäher täzelenişiniň nyşanyna öwürýär” diýip, Mitrex-de belleýärler.
Ulgam uglerod zyňyndylaryny ýylda 150 tonna azaltdy we sebitiň arassa energiýa maksatlaryna laýyk gelýär. Bu başlangyç diňe bir energiýa tygşytlylygy üçin däl, eýsem şäher fasadlaryny medeni integrasiýa üçin ulanmagyň ösýän tendensiýasyny görkezýär.
SunRise taslamasy tehnologiýany we çeper suratlandyrmany birleşdirip, BIPV-iň şäheri döwrebaplaşdyrmagyň guraly hökmündäki potensialyny görkezýär. Ol durnukly ösüş bilen gyzyklanýan beýleki şäherler we ýurtlar üçin nusgalyk bolup biler.
