Lucid Air elektrik sedany bir gezeklik zarýad bilen 1205 km ýol geçip, dünýä rekordyny goýdy. Bu üstünlik Ginnesiň rekordlar kitaby tarapyndan resmi taýdan bellige alyndy. Rekord Sankt-Moris şäherinden (Şweýsariýa) Mýunhen şäherine (Germaniýa) çenli aralykda, Ýewropanyň umumy ýollarynda goýuldy.
Sedanyň Grand Touring wersiýasy dag serpantinleriniň hem-de awtobanlaryň üsti bilen adaty sürüş şertlerinde bu aralygy geçdi. Täze rekord ozalkydan 160 kilometr uzak boldy.
Ýewropada bu model 831 at güýjüni öndürýän elektromotor we WLTP aýlawyna görä 960 km çenli ýol geçýän batareýa bilen enjamlaşdyrylar.
Germaniýada Lucid Air Grand Touring modeliniň bahasy 129 900 ýewrodan başlanýar.
Geçen ýylyň tomsundaky täzelenmeden soň, Lucid kompaniýasy Air modelini ABŞ-da köpçülikleýin önümçilikdäki iň energiýa tygşytlaýjy elektrokar diýip atlandyrdy. Modeliň esasy wersiýasy bir kilowatt-sagat elektrik energiýasy bilen 8 km çenli ýol geçip bilýär.
2022-nji ýylda Mercedes-Benz Vision EQXX hem şuňa meňzeş netijäni görkezipdi. Ol hem bir gezeklik zarýad bilen Germaniýadan Beýik Britaniýa çenli 1202 km ýol geçipdi, ýöne ol diňe synag üçin döredilen prototipdi. Lucid Air tarapyndan goýlan rekord bolsa, köpçülikleýin önümçilikdäki elektrokarlar üçin ilkinji boldy.
