“Liwerpul” futbol kluby toparyň aradan çykan hüjümçisi Diogu Žotanyň hatyrasyna 20-nji belgini dolanyşykdan aýyrýandygyny habar berdi. Bu barada klubuň saýtynda ýerleşdirilen resmi beýanda aýdylýar.
“Bu onuň buýsanç we mertebe bilen göteren, köp sanly ýeňişlere getiren belgisidi. Diogu Žota hemişe “Liwerpul” futbol klubunyň 20-nji belgisi bolup galar” – diýlip, habarda aýdylýar.
Klub bu çözgüdiň oýunçynyň aýaly Rute we onuň garyndaşlary bilen maslahatlaşmadan soň kabul edilendigini belledi. 20-nji belgi indi “Liwerpulyň” hiç bir toparynda, şol sanda zenanlar toparynda we akademiýada hem ulanylmaz.
“Bu ädim diňe bir portugaliýaly ýigidimiziň soňky bäş ýylda klubuň üstünliklerine goşan ägirt uly goşandynyň däl, eýsem onuň öz topardaşlaryna, kärdeşlerine we janköýerlere ýetiren şahsy täsiriniň, şeýle-de olar bilen ýola goýan berk arabaglanyşygynyň ykrar edilmegidir” – diýlip, beýanda aýdylýar.
Diogu Žota “Liwerpulda” 2020-nji ýylyň sentýabryndan bäri çykyş etdi. Ol “Wulwerhemptondan” geçdi. Klub üçin 182 oýna gatnaşyp, 65 gol geçirdi we 26 assist etdi. “Liwerpulyň” düzüminde Angliýanyň çempionatynyň, Angliýanyň Kubogynyň we iki gezek Iňlis ligasynyň kubogynyň ýeňijisi boldy.
Futbolçy 28 ýaşynda awtoulag heläkçiliginde heläk boldy. Onuň bilen bilelikde 26 ýaşly jigisi Andre hem aradan çykdy. Ol hem professional futbolçy bolup, Portugaliýanyň “Penafiel” klubunda oýnaýardy.
