Nvidia-nyň baş direktory Jensen Huang dünýäniň iň baý adamlarynyň ilkinji ýediligine girip, Uorren Baffetden we Stiw Balmerden öňe geçdi. Bu barada Fortune reýtingine salgylanyp, CNBC habar berýär.
Neşiriň maglumatlaryna görä, Huangyň baýlygy 143,6 mlrd dollar diýlip hasaplanylýar. Dünýäniň iň baý maýadarynyň baýlygy bolsa, takmynan, 142 mlrd dollara, Microsoft-yň öňki baş direktorynyňky 142,6 mlrd dollara barabar. Indi sanawda Huangyň ýakyn bäsdeşi 149 mlrd dollar baýlygy bolan Google-yň egindeş esaslandyryjysy Larri Peýjdir.
Huangyň şahsy kapitalynyň ösmegi onuň kompaniýasynyň paýnamalarynyň ösmegi bilen baglanyşyklydyr. 2025-nji ýylyň başyndan bäri olaryň bahasy tas 23% ýokarlandy. Netijede, Nvidia-nyň bazar bahasy dünýäde ilkinji bolup 4 trln dollardan geçdi.
Ýakynda Nvidia-nyň ýolbaşçysy kompaniýanyň 225 000 paýnamasyny satdy, bu hem oňa 36 mln dollar gazanmaga mümkinçilik berdi. Iýun aýynyň başynda şeýle şertnamanyň netijesinde ol 15 mln dollar gazandy. Geçen ýyl kompaniýanyň gymmatly kagyzlarynyň satuwy Huanga, takmynan, 700 mln dollar getirdi. Bu şertnamalardan soň, Huang gönüden-göni we dürli gaznalar arkaly kompaniýanyň ýene 858 milliondan gowrak paýyna eýeçilik edýär.
CNBC-niň bellemegine görä, EA çiplerini işläp düzmek we öndürmek ugry korporasiýanyň girdejililigine uly goşant goşýar. Bu gurluşlar Taýwanyň TSMC kompaniýasynyň kömegi bilen öndürilýär we kompaniýa oýun segmentinden alýan girdejisinden 10 esse ýokary girdeji getirýär.
