Ispaniýaly Karlos Alkaras bilen italiýaly Ýannik Sinner “Uimbldonyň” finalynda duşuşar. Ozal “Rolan Garrosyň” hem aýgytly oýnunda şeýle bolupdy. Alkaras üçin bu ýaryşyň yzygider üçünji finaly, Sinner üçin bolsa “Uimbldonyň” otly kortunda karýerasynda ilkinji bolar.
“Uimbldonyň” häzirki çempiony Alkaras ýarym finalda amerikaly Teýlor Frisi 6:4, 5:7, 6:3, 7:6 (8:6) hasabynda utdy. Oýun 2 sagat 49 minut dowam etdi we 32 gradusa çenli temperaturada geçdi. Oýun tomaşaçylaryň ýagdaýlarynyň ýaramazlaşmagy sebäpli ençeme gezek kesildi. Alkaras yssy howa we garşydaşynyň güýçli urgularyna garşy durup, ýaryşda durnukly oýny görkezmegi başardy.
Dünýäniň birinji raketkasy Sinner ýarym final duşuşygynda “Uimbldonyň” ýedi gezek çempiony Nowak Jokowiçi 6:3, 6:3, 6:4 hasabynda utdy. Italiýaly üçin bu “Uly tuwulga” ýaryşlarynyň yzygider dördünji finaly bolar.
Jokowiç bolsa 2017-nji ýyldan bäri ilkinji gezek “Uimbldonyň” finalyna çykyp bilmedi. Şeýle-de, ol Flawio Kobolli bilen geçenki oýunda alan şikesinden soň oňaýsyzlyk duýdy. Sinner hem dördünji tapgyrda ýykylandan soň, tirsegi daňyly çykyş edýär.
Alkaras yzygider 24 ýeňiş gazanyp gelýär. 13-nji iýulda Londonda geçiriljek final Sinner üçin ýakynda Pariždäki ýeňliş üçin Alkarasdan rewanş almaga pursat bolar. Şeýle-de bolsa, tennisçi öz garşydaşyna hormat bilen garaýar.
“Meniň üçin Karlos bilen ýene oýnamak uly mertebe. Biz biri-birimize kämilleşmäge kömek edýäris, ol – meniň kumirlerimiň biri” – diýip, Sinner aýtdy.
