Emeli aň Microsoft korporasiýasyna soňky bir ýylda koll-merkezleriniň işinde 500 mln dollardan gowrak tygşytlamaga mümkinçilik berdi diýip, Bloomberg habar berýär.
Bu barada maglumaty Microsoft-yň baş täjirçilik müdiri Jadson Oltoff aýtdy. Ol EA gurallarynyň satuwdan we müşderilere hyzmat etmekden başlap, programma üpjünçiligini işläp taýýarlamaga çenli ähli ugurlarda netijeliligi ýokarlandyrýandygyny belledi. EA diňe bir çykdajylary azaltmaga mümkinçilik bermän, eýsem işgärleriň we müşderileriň kanagatlylyk derejesini-de artdyrdy.
Bellenilişi ýaly, Copilot her bir satuw menejerine has köp müşderi tapmaga, şertnamalary çalt baglaşmaga we girdejini 9% ýokarlandyrmaga mümkinçilik berýär.
Şeýle-de, Microsoft kiçi we orta kompaniýalara kömek etmek üçin EA-dan peýdalanyp başlady – bu başlangyç heniz irki tapgyrda, ýöne eýýäm onlarça million dollar getirýär diýip, Oltoff aýdýar.
Ol täze önümler üçin koduň 35%-iniň EA tarapyndan döredilýändigini, munuň bolsa çözgütleri durmuşa geçirmegi çaltlaşdyrýandygyny belledi. Kompaniýanyň maglumatlaryna görä, GitHub Copilot-yň 15 mln ulanyjysy bolup, ol EA programmirleme bazarynda öňdebaryjy orny eýeleýär.
Bloomberg uly IT kompaniýalarynyň indi EA-nyň kömegi bilen ozal adamlar tarapyndan ýerine ýetirilýän işleri awtomatizirläp başlandygyny belleýär. Mysal üçin, Salesforce-da içki işleriň 30%-ini eýýäm EA ýerine ýetirýär, bu hem işgär almagy azaltmaga mümkinçilik berýär. Alphabet Inc. we Meta Platforms Inc.-iň ýolbaşçylary koduň esli böleginiň indi EA-nyň kömegi bilen döredilýändigini habar berdi.
Belläp geçsek, EA-nyň ösmegi netijesinde Microsoft ýylyň başyndan bäri 15 müň töweregi işgäri işden çykardy.
