ABŞ-nyň Prezidenti Donald Tramp ýurduň ulag ministri Şon Daffini Aeronawtika we kosmos giňişligini öwrenmek boýunça milli müdirligiň (NASA) wagtlaýyn ýolbaşçysy wezipesine belledi. Ak tamyň ýolbaşçysy bu barada özüniň Truth Social sosial torunda habar berdi.
«Şon ýurdumyzyň ulag meseleleri bilen meşgullanyp, uly işleri ýerine ýetirýär. Muňa döwrebap howa hereketlerini dolandyrmak ulgamlaryny döretmek bilen bir hatarda, ýollarymyzy we köprülerimizi abatlap, olary täzeden netijeli we owadan ýagdaýa getirmegi hem girýär. Ol gysga wagtlygyna hem bolsa, möhüm kosmos agentligine fantastiki lider bolar» — diýip, Tramp ýazdy.
Şon Daffi NASA-nyň ýolbaşçylygyny ulag ministri wezipesi bilen utgaşykly ýerine ýetirer.
«Bu missiýany kabul etmek meniň üçin uly mertebe. Indi, kosmosy basyp almagyň wagty» — diýip, ministr X sosial torundaky sahypasyndan jogap berdi.
Şeýle hem belläp geçsek, geçen ýylyň dekabrynda Tramp NASA-nyň ýolbaşçylygyna milliarder astronawt Jared Aýzekmany hödürläpdi. Şol wagtlar ony «kosmosa bolan höwesini, astronawtlyk tejribesini we ylmy-gözlegleriň çäklerini giňeltmäge bolan ymtylmasyny» göz öňünde tutup, iň laýyk dalaşgär diýip atlandyrypdy. «Reuters» agentligi Aýzekmanyň dalaşgärligini SpaceX kompaniýasynyň ýolbaşçysy milliarder Ilon Maskyň goldandygyny ýazypdy. Ýeri gelende aýtsak, Aýzekman Maskyň ýakyn ýaranlarynyň biri hökmünde tanalýar.
Emma iýun aýynda Tramp Aýzekmanyň kandidaturasyny ABŞ-nyň Senaty tarapyndan tassyklanmagyna birnäçe gün galanda, garaşylmadyk ýagdaýda yzyna aldy. KHBS munuň sebäbini onuň demokratlaryň tanymal wekilleri bilen arabaglanyşygynyň bardygy we olaryň işlerine maliýe goldawyny bermegi bilen düşündiripdi. Aýzekman bolsa kandidaturasynyň yzyna alynmagynyň sebäbini, esasanam, Tramp bilen Maskyň arasyndaky gatnaşyklaryň ýaramazlaşmagyndan soň, geňeşçileriň basyşynyň güýçlenmegi bilen düşündirdi.
