BYD hytaý kompaniýasy 2027-nji ýylda aşa berk (solid-state) akkumulýatorly elektromobilleriň köpçülikleýin önümçiligine başlajakdygyny mälim etdi. Täze tehnologiýa bilen ulaglar 1000 km-den gowrak ýol aralygyny geçer hem-de 12 minutdan az wagtda doly zarýadlanar.
Öndürijiniň maglumatlaryna görä, gaty berk batareýalaryň energiýa dykyzlygy 400 Wt·s/kg-a ýetýär, bu bolsa häzirki zaman litiý-ion çözgütleriň köpüsinden iki esse ýokarydyr. Synaglarda ulaglaryň 1500 km-e çenli aralygy geçendigi we 12 minutdan az wagtda doly zarýadlanandygy aýdylýar. Halkara WLTP aýlawyna görä, görkeziji 1200 km-den geçýär.
Önümçilik orta we ýokary derejeli modeller üçin çäkli möçberde ýola goýlar. Häzirki wagtda BYD Seal sedany bilen synag işleri alnyp barylýar. Şol bir wagtyň özünde, kompaniýa mega-zarýad beketleriniň infrastrukturasynyň gurluşygyny hem bilelikde alyp barýar.
Kompaniýanyň bellemegine görä, täze tehnologiýalaryň işlenip düzülmeginde emeli aň giňden ulanylýar, bu bolsa ylmy-barlag we işläp düzüş işleriniň tizligini 10-100 esse çaltlaşdyrýar. BYD batareýalaryň özüne düşýän bahasyny peseldip, 2030-njy ýyla çenli köpçülikleýin bazara çykmagy maksat edinýär.
Toyota, Mercedes we Volkswagen ýaly beýleki awtoulag öndürijileri henizem diňe prototip derejesinde iş alyp barýan bolsalar, BYD akkumulýatorlaryň işläp düzülmeginden başlap, awtoulaglaryň ýygnanmagyna çenli ähli tapgyrlary öz içine alýan dik integrirlenen gurluşy arkaly önümçilige eýýämden doly taýýar.
