9-njy iýulda Nvidia bazar bahasy 4 trln dollardan geçen taryhda ilkinji jemgyýetçilik kompaniýasy boldy. Nasdaq söwdasynda amerikan mikroçip öndürijisiniň paýnamalary bir paý üçin 164,2 dollara ýetdi, bu hem kompaniýa öň ýetilmedik görkezijä ýetmäge mümkinçilik berdi.
2025-nji ýylyň başyndan bäri Nvidia-nyň bahasy tas 20% ýokarlandy. Munuň esasy sebäbi kompaniýanyň emeli aň tehnologiýalarynda ulanylýan çiplerine islegiň ýokarlanmagy boldy. Nvidia ösen EA prosessorlarynyň önümçiliginde öňdebaryjy orny eýeleýär.
Birinji çärýegiň jemi boýunça, kompaniýa 44 mlrd dollar möçberde rekord girdejini hasaba aldy – bu geçen ýylyň degişli döwri bilen deňeşdirilende 69% köpdür. Düşewünt 26% ýokarlandy.
Nvidia 1993-nji ýylda esaslandyryldy. Kompaniýanyň ştab-kwartirasy Santa-Klara (Kaliforniýa, ABŞ) ýerleşýär. Ilkibaşda ol oýun kompýuterleri üçin wideokartlary döretmek bilen meşgullanýardy, ýöne soň EA çiplerini döretmäge hem ýöriteleşip başlady. Ol 2024-nji ýylyň fewralynda ilkinji gezek 2 trln dollar belliginden geçdi we şol ýylyň iýunynda 3 trln dollar görkezijisine ýetdi.
Mundan öň 4 trln dollara Apple golaýlady, onuň bazar bahasy 2024-nji ýylyň dekabrynda 3,915 trln dollar boldy.
Häzirki wagtda şu kompaniýalaryň bazar bahalary 1 trln dollardan geçýär: Microsoft ($3,756 trln), Apple ($3,137 trln), Amazon ($2,369 trln), Alphabet ($2,151 trln), Meta ($1,842 trln), Broadcom ($1,304 trln) we TSMC ($1,199 trln). Adatça, “trillionerleriň klubuna” girýän Tesla-nyň kapitalizasiýasy häzirki wagtda 961,89 mlrd dollara barabar.
