Stellantis konserni BlueHDi dizel hereketlendirijilerinde gaz paýlaýjy mehanizm zynjyrynyň wagtyndan öň könelýändigi sebäpli Ýewropada awtoulaglary köpçülikleýin yzyna çagyrmak kampaniýasyny başlatdy. Hyzmat kampaniýasy 2017-nji ýylyň oktýabr aýyndan 2023-nji ýylyň ýanwaryna çenli öndürilen alty brende - Peugeot, Citroen, Opel, Vauxhall, DS we Fiat modellerine degişli.
Yzyna çagyrylýan awtoulaglaryň takyk sany aýdylmady, ýöne Automotive News Europe-yň berýän habaryna görä, Fransiýada geçirilýän kampaniýa takmynan 930 müň awtoulaga, Belgiýada ýene 117 müň awtoulaga degişli.
Mesele hereketlendirijide daşky sesleriň çykmagyna, käbir ýagdaýlarda bolsa onuň döwülmegine sebäp bolup biljek gaz paýlaýjy mehanizm zynjyrynyň çalt könelmeginde bolup durýar. Stellantis häzirki wagtda bu kemçilik bilen baglanyşykly ýekeje hadysanyň-da hasaba alynmandygyny aýtdy.
Kampaniýanyň çäginde hereketlendirijiniň sesini seljerýän ýörite programma arkaly zynjyryň ýagdaýy barlanar. Zerur bolsa, bölek şaýy çalşylar we programma üpjünçiligi hem täzelener.
Geçen aý konsern Takata howpsuzlyk ýassygynyň kemçiligi zerarly ýüze çykyp biljek howp bilen bagly 441 müň Citroen C3 we DS3 awtoulaglarynyň yzyna çagyrylýandygyny habar beripdi.
