ChatGPT kosmos gämisini dolandyrmaga ukyply bolup çykdy. Ol «Kerbal Space Program Differential Games» atly simulýasiýadaky uçuş bäsleşiginde ikinji orny eýeledi. Bu barada «Live Science» neşiri habar berýär.
Bäsleşik ilkinji gezek 2023-nji ýylda Massaçusets tehnologiýa institutynyň başlangyjy bilen geçirilip başlandy. Ol Ýere ýakyn orbitada manýowr etmek boýunça wirtual türgenleşik görnüşinde geçirilýär. Ssenarileriň biri gaçyp barýan kosmos apparatyny yzarlamagy göz öňünde tutýardy.
Bu wezipede ChatGPT bilen LLaMA atly dil modelleri wirtual söweş uçarynyň operatorlary hökmünde çykyş etdiler. Olara nyşana barada hem-de ýangyjyň möçberi hakda tekst görnüşinde maglumat berilýärdi, olar bolsa jogap hökmünde gämini dolandyrmak üçin buýruklary berýärdiler we öz hereketlerini düşündirýärdiler, meselem: «Gaçyp barýan sagda we ýokarda. Saga we ýokary tarapa itergi bermeli, ýöne inersiýany hem göz öňünde tutmaly».
Synaglaryň netijelerine görä, emeli aň köp sanly adaty dolandyryş ulgamlaryndan has ýokary netije görkezip, diňe SpaceX kompaniýasynyň Dragon kosmos gämilerinde ulanylýan ulgamlardan ýeňildi.
Klassyky algoritmler takyk kesgitlenen formulalara we öňünden ýazylan ssenarilere esaslanýar. Olardan tapawutlylykda, çat-botlar ähtimallyga esaslanýan modeller bilen işleýärler we täze ýagdaýlara uýgunlaşyp bilýärler. Bu olara garaşylmadyk ýagdaýlarda artykmaçlyk berýär. Şeýle-de bolsa, olaryň möhüm bir kemçiligi saklanyp galýar – emeli aň käwagt düşündirip bolmaýan «gallýusinasiýalary» görüp, nädogry ýa-da manysyz buýruklary berip biler.
