Germaniýaly Franzis kompaniýasy Porsche 911 Turbo (930) modeliniň hereketlendirijisiniň görnüşinde özbaşdak ýygnamaga niýetlenen uly konstruktory hödürledi. Ol 250 detaldan ybarat bolup, Porsche-niň meşhur turbinaly hereketlendirijisini täzeden janlandyrýar.
Bellenmegine görä, ähli elementler Porsche-niň arhiw çyzgylaryna görä taýýarlanypdyr. Ýygnalan hereketlendiriji iş prinsiplerini görkezýär. Modeliň açyk korpusy arkaly porşenleriň, klapanlaryň we beýleki içki mehanizmleriň hereketini synlap bolýar. Uçgun dörediji sweçlere LED yşyklar ýerleşdirilen, olar hereketlendirijniň «ot alyş» pursady bilen sinhron ýagtylanýar. Mundan başga-da, gurluşda daşarky gürleýjilere birikdirmäge ukyply, hakyky hereketlendirijiniň sesini gaýtalaýan ses moduly hem bar.
Franzis kompaniýasy konstruktory ýygnamak üçin ýelimiň ýa-da boýagyň gerek däldigini belläp geçýär. Işläp düzüjileriň bahalandyrmasyna görä, konstruktory doly ýygnamak prosesi 3-4 sagada çekýär. Taýýar modeliň ölçegi, takmynan, 35×30×30 santimetr bolýar. Ol konstruktoryň düzümindäki ýörite postamentiň üstünde goýlubam bilner.
Kompaniýa topluma şeýle hem hereketlendirijiniň işlenip düzüliş taryhyny we Porsche-niň arhiw suratlaryny öz içine alýan bukleti hem goşýar.
